သီပေါမြို့နယ် နမ့်လန်ကျေးရွာတွင် ဈေးမီးလောင်မှုဖြစ်ပွားပြီး ဈေးဆိုင်ခန်းအားလုံး မီးလောင်ဆုံးရှုံး

နမ့်လန်ကျေးရွာရှိ စည်ပင်သာယာဈေး မီးလောင်ကျွမ်းနေစဉ်

ရှမ်းပြည်နယ် (မြောက်ပိုင်း)၊ သီပေါမြို့နယ် နမ့်လန်ကျေးရွာတွင် နိုဝင်ဘာ ၆ ရက် ညနေ ၆ နာရီခွဲခန့်က နမ့်လန်ကျေးရွာရှိ စည်ပင်သာယာဈေး မီးလောင်ကျွမ်းမှုဖြစ်ပွားခဲ့ကြောင်း သိရသည်။

မီးလောင်ကျွမ်းမှုကြောင့် နမ့်လန်ကျေးရွာ စည်ပင်သာယာဈေးရှိ ဈေးဆိုင်ခန်းအားလုံး မီးလောင်ကျွမ်းခံခဲ့ရကြောင်း သိရသည်။

“မီးလောင်တဲ့အချိန်က ဈေးလည်းပိတ်ပြီးပြီ။ ဈေးတံခါးတွေလည်း အကုန်လုံးသော့ခတ်ပြီးပြီ။ ဈေးအလယ်လောက်ကနေ စလောင်တာပေါ့။ မီးလောင်မှုကို ငြှိမ်းသတ်ဖို့ သီပေါ၊ လားရှိုး၊ ကျောက်မဲ၊ နောင်မွန်ကနေ မီးသတ်ကားတွေလာပြီး ငြှိမ်းသတ်ကြပါတယ်။ ဈေးဆိုင်ခန်းတွေ တစ်ဈေးလုံးလည်း အကုန်လုံး လောင်သွားပါတယ်။ ဘေးအိမ်တွေကိုတော့ မီးမကူးပါဘူး” ဟု ပြည်နယ်လွှတ်တော်ကိုယ်စားလှယ် ဦးစိုင်းခမ်းအောင်က ပြောကြားသည်။

“ဈေးရဲ့ လေးဖက်လေးတန်က မီးလောင်ကျွမ်းနေတဲ့အရာတွေကို ဘူဒိုဇာနဲ့အထဲက တွန်းပို့နေတယ်။ ဘေးပတ်ဝန်းကျင်ကို မီးမကူးနိုင်အောင်လို့။ ညနေ ၆ နာရီခွဲလောက်ကနေ မီးစလောင်တာ။ ည ၈ နာရီခွဲထိကို မီးတောက်တွေက တဟုန်းဟုန်းတက်နေတုန်း။ ၉ နာရီခွဲလောက်ရောက်မှ မီးတောက်ကြီးက ကျသွားတယ်။ စိတ်ချရတဲ့ အနေအထား ဖြစ်သွားတယ်။ ဈေးအလယ်မှာတော့ လောင်နေတုန်းပဲ။ ဘေးပတ်ဝန်းကျင်အိမ်တွေကို မလောင်နိုင်တော့ပါဘူး။ အိမ်တွေကတော့ တစ်အိမ်မှ မီးမကူးပါဘူး။ တခြားမြို့က မီးသတ်ကားတွေ ရောက်လာမှပဲ မီးကိုနိုင်သွားတာ။ ဆိုင်ခန်းပေါင်းက ၃၀၀ ကျော်ရှိပါတယ်။မီးစလောင်တာက ဈေးအလယ်ကောင်ကနေ စပြီးလောင်တာပါ” ဟု နမ့်လန်ကျေးရွာမှ စိုင်းဆမ်လင်းက ဆိုသည်။

နမ့်လန်ကျေးရွာသည် ရပ်ကွက် (၁၁) ရပ်ကွက်နှင့် အိမ်ခြေပေါင်း ၄၀၀၀ ကျော်ရှိပြီး ယခုမီးလောင်ကျွမ်းသွားသော နမ့်လန်ဈေးသည် ဈေးဆိုင်ခန်းပေါင်း ၃၀၀ ကျော် ခန့်ရှိကြောင်း သိရသည်။
Writer: ထွန်းနေလှိုင် (နောင်ပိန်)

Eleven Media Group
http://www.news-eleven.com/

ဗြိတိန်နိုင်ငံသားအသတ်ခံရမှု သံသယရှိသူ လွတ်မြောက်

ဗြိတိန်နိုင်ငံသားအသတ်ခံရမှု ဖြစ်ခဲ့သည့် နေအိမ် (MOI)

ရန်ကုန်မြို့လယ်ရှိ နေအိမ်တိုက်ခန်းတခုအတွင်း ဗြိတိန်နိုင်ငံသားတဦး အသတ်ခံရမှုအတွက် သံသယရှိသူဟာ ထိုင်းနိုင်ငံကို ထွက်ခွာသွားပြီး၊ သူ့ကို ဖမ်းမိဖို့ နိုင်ငံတကာရဲတပ်ဖွဲ့ကို အကြောင်းကြားထားတယ်လို့ မြန်မာနိုင်ငံရဲတပ်ဖွဲ့က ပြောပါတယ်။ သံသယနဲ့ အလိုရှိနေသူဟာလည်း ဗြိတိန်နိုင်ငံသားဖြစ်ပြီး၊ သူတို့နှစ်ဦးစလုံးဟာ ရန်ကုန်မြို့ နိုင်ငံတကာကျောင်းတကျောင်းက ကျောင်းဆရာတွေဖြစ်ကြပါတယ်။ စုံစမ်းမေးမြန်းထားတဲ့ မမေခက သတင်းပေးပို့ထားတာပါ။

ပြီးခဲ့တဲ့ နိုဝင်ဘာ ၆ ရက်နေ့က ရန်ကုန်မြို့လယ်က ၃၉ လမ်း အလယ်ဘလောက် ပထမထပ် တိုက် ခန်းတစ်ခန်းမှာ ဗြိတိန် နိုင်ငံသားတစ်ဦးသတ်ခံခဲ့ရပါတယ်။ နိုင်ငံတကာကျောင်းတခုမှာ ဆရာအနေ နဲ့လုပ်ဆောင်နေတဲ့ သေဆုံးသူဟာ သာကေတမြို့နယ်၊ မြခွာညိုအိမ်ရာမှာ နေထိုင်သူတဦးပါ။ သေ ဆုံးခဲ့တဲ့ နေအိမ်ကတော့ သေဆုံးသူသူငယ်ချင်း ဗြိတိန်နိုင်ငံသားတဦး နေထိုင်တာ ဖြစ်ပြီး လက်ရှိ ချိန်မှာတော့ အိမ်ပိုင်ရှင် ဖြစ်တဲ့ သေဆုံးသူရဲ့ သူငယ်ချင်းဟာ ထိုင်းနိုင်ငံကိုထွက်ခွာသွားတာကြောင့် သူ့ကို သံသယ ရှိဆုံးသူအနေနဲ့ ရဲတပ်ဖွဲ့က သတ်မှတ်ထားပါတယ်။

ကျောက်တံတား စခန်းမှုး ဦးတိုးမြို့က လက်ရှိစစ်ဆေးနေမှုကိုပြောပြတာပါ။

“သေဆုံးတဲ့ သူရဲ့အမျိုးသမီးကလည်း အဲဒီလူကို အမှုဖွင့်ထားတယ်။ ဖွင့်ထားတော့ကျနော်တို့က ဆက်ပြီးတော့ စုံစမ်းတာပေါ့။ သူကလည်း အဲဒီနေ့က ၄ ရက်နေ့ညက အတူတူသောက်စားပြီး ၊ ၅ ရက်နေ့မနက်မှာ အိမ်ကိုရောက်တယ် အဲဒီမှာလည်း သောက်စားပြီးတော့ ၅ ရက်နေ့ညနေကပဲ ထွက်သွားတာ။ ကျနော်တို့ ဆီသတင်းပို့တာ ၆ ရက်နေ့မှ သိတာလေ မနေ့က မှသိတာပါ။ သူထွက်သွားတဲ့အကြောင်းကို ကျနော်တို့တောင်မှ ဆင့်ကဲဆင့်ကဲတင်ပြပြီးတော့ သူ့ကို ဖမ်းဖို့ တင်ပြထားရတာပေါ့။ အခုက ဒီနိုင်ငံထဲမှာ မရှိတော့ဘူး မနေ့က ထွက်သွားပြီဆိုတော့ ၅ ရက်နေ့ကတည်းက ထွက်သွားတာလေ။ တခြားသံသယရှိတဲ့လူတွေ တခြားတော့ ပေါ်တာမရှိသေးပါဘူး။ လောလောဆယ် လက်တလောကတော့ သူပဲရှိနေတာ။ တရားလိုကိုယ်တိုင်ကလည်း သူ့ကို direct စွပ်စွဲတာပေါ့ ကျနော်တို့လည်း တင်ပြပြီးတော့ ဆောင်ရွက်စဲပါပဲ။”

သေဆုံးသူနာမည်ကတော့ Mr. Peter Gary Ferguson ဖြစ်ပြီး သံသယရှိသူ နာမည်ကတော့ Mr. Harris John Italo Binotti ဖြစ်တယ်လို့ ပြောပါတယ်။ လက်ရှိမှာ သံသယရှိတဲ့ မစ္စတာ ဟယ်ရီကို ဖမ်းနိုင်ဖို့ ကဒီနိုင်ငံထဲက ထွက်ခွာ သွား တာကြောင့် နိုင်ငံတကာရဲတပ်ဖွဲ့ကို အကြောင်းကြားထားပြီး ဆက်လက်အမှုကို စိစစ်နေဆဲဖြစ်ပါတယ်။

ကျောက်တံတား စခန်းမှုး ဦးတိုးမြို့က ပြောပြချက်အရကတော့ အခင်းဖြစ် တိုက်ခန်းနေ နိုင်ငံခြားသားမှာ သေဆုံးသူ ဗြိတိန်နိုင်ငံသားနဲ့နောက်ဆုံးအတူရှိခဲ့တာဖြစ်ပြီး ရန်ကုန်မြို့ ရှိ International School တစ်ခုမှာ အတူတကွ ကျောင်းဆရာအဖြစ် အလုပ်လုပ်ကိုင် နေသူဖြစ်တယ်လို့ စစ်ဆေးတွေ့ရ တယ်လို့ပြောပါတယ်။ သေဆုံးသူဟာ ပြီးခဲ့တဲ့ နိုဝင်ဘာ ၄ရက်နေ့ညပိုင်းက အခင်းဖြစ် တိုက်ခန်းနေ နိုင်ငံခြားသားနဲ့အတူ အဲဒီအခင်းဖြစ်တိုက်ခန်းမှာ အရက်အတူ သောက်ခဲ့ကြကာ အဲဒီနေရာမှာ သေဆုံးခဲ့တာဖြစ်ပါတယ်။ သေဆုံးသူကို နိုဝင်ဘာ ၆၇က်နေ့မှ အဲဒီတိုက် ခန်းမှာ သေဆုံးနေတာတွေ့ရတာပါ။ သေဆုံးသူရဲ့ အတူနေ နိုင်ငံခြားသားအမျိုးသမီးကတော့ သူမယောက်ကျား သေဆုံးမှု နဲ့ပတ်သတ်ပြီး တိုက်ခန်းနေဗြိတိန်နိုင်ငံခြား သား ကို နိုဝင်ဘာ ၆၇က်နေ့ မှာဘဲ သေဆုံးမှုနဲ့အမှုဖွင့်ခဲ့တာဖြစ်ပါတယ်။

သံသယရှိသူမှာ ပြီးခဲ့တဲ့ နိုဝင်ဘာ ၅ ရက်နေ့ ညနေပိုင်းက လေကြောင်းလိုင်း တစ်ခုနဲ့ ထိုင်းနိုင်ငံကို ထွက်ခွာသွား တယ်လို့ စစ်ဆေးတွေ့ရှိထားပါတယ်။

ဗွီအိုအေ (မြန်မာပိုင်း )
http://burmese.voanews.com/

လားရှိုးမြို့တွင် ဖခင်ဖြစ်သူက သားသမီးငါးဦးအား ဓားဖြင့်လှီးသတ်သဖြင့် နှစ်ဦးသေဆုံးပြီး သုံးဦး ဒဏ်ရာရ

ရှမ်းပြည်နယ် (မြောက်ပိုင်း)၊ လားရှိုးမြို့တွင် ဖခင်ဖြစ်သူမှ မိမိ၏ သားသမီးငါးဦးအား ဓားဖြင့်လှီးသတ်သဖြင့် နှစ်ဦး သေဆုံးပြီး သုံးဦး ဒဏ်ရာရရှိခဲ့ကြောင်း သိရသည်။

ဖြစ်စဉ်မှာ နိုဝင်ဘာ ၅ ရက် ည ၁၁ နာရီခန့်တွင် လားရှိုးမြို့၊ ရပ်ကွက်(၅)၊ နယ်မြေ (၄)၊ ချယ်ရီလမ်းနေ အိုက်ကျုံး (ခ) အိုက်ကျွမ်း (၃၇)နှစ်သည် မိမိ၏ သားသမီး ငါးဦးအား ဓားဖြင့်လှီးသတ်သဖြင့် ကလေးငါးဦးအနက် မောင်ဆွေလောင်း (လေးနှစ်) တွင် ယာကုပ် ပြတ်ရှဒဏ်ရာ၊ မောင်ဆိုင်မိန်း (နှစ်နှစ်) တွင် လည်ပင်းဝဲဘက် ပြတ်ရှဒဏ်ရာဖြင့် သေဆုံးခဲ့ပြီး မောင်ညီနပ် (ငါးနှစ်)၊ မရယ်လင်း (ခုနစ်နှစ်) လည်ပင်း ပြတ်ရှဒဏ်ရာ၊ မရေးကပ် (ကိုးလ) တွင် ပါးစပ် ဓားဒဏ်ရာများ ရရှိခဲ့သည်။

“ဦးအိုက်ကျုံးက ကလေးတွေနဲ့ သူ့မိန်းမကို အိပ်ကြရအောင်ဆိုပြီး အိပ်ခန်းထဲမှာ ခေါ်သွားပြီး အိပ်မယ်လို့ပြောတယ်။ နောက်သူက ဓားကိုထုတ်ယူနေတဲ့အချိန် သူ့မိန်းမက အကူအညီတောင်းဖို့ တစ်အိမ်ကျော်က သူ့မောင်လေးအိမ်ကိုပြေးပြီး သွားအကူအညီတောင်းတာ။ ပြေးပြီးသွားခေါ်တဲ့အချိန်မှာ ကလေးတွေကို ဓားနဲ့ လှီးထားတာ။ သမီးနှစ်ယောက်နဲ့ သားလေးယောက်ရှိတာ။ စုစုပေါင်း ရှစ်ယောက်ရှိတဲ့ထဲက သားအကြီးဆုံးက သူ့အဘိုးအိမ်မှာသွားနေတော့ လွတ်သွားတာ။ ဒီအိမ်မှာနေတာက သူတို့လင်မယားရယ် သားသမီး ငါးဦးရယ် စုစုပေါင်း ခုနစ်ယောက်နေတာပါ။ ဦးအိုက်ကျုံးက အရင်ကပန်ဆန်းဘက်မှာ ပန်းရန်သွားလုပ်တယ်။ အခုပြန်လာတာ သိပ်တော့ မကြာသေးဘူး” ဟု တစ်ရပ်ကွက်ထဲနေ အိမ်နီးချင်းဖြစ်သူ ဒေါ်ယေ့ကားက ပြောကြားသည်။

ဦးအိုက်ကျုံးသည် မိမိ၏ သားသမီး ငါးဦးအား ဓားဖြင့်လှီးပြီး မိမိကိုယ်မိမိလည်း ဓားဖြင့် လည်ပင်းလှီးသဖြင့် လည်ပင်းတွင် ပြတ်ရှဒဏ်ရာ ရရှိထားကာ လားရှိုး ပြည်သူ့ဆေးရုံကြီး ခွဲစိတ် ကုသဆောင်တွင် ဆေးကုသမှု ခံယူနေကြောင်း သိရသည်။

ကလေးများအား သေဆုံးအောင်နှင့် ဒဏ်ရာ ရရှိအောင်ပြုလုပ်သူ အိုက်ကျုံး (ခ) အိုက်ကျွမ်း (၃၇) နှစ်အား လားရှိုးမြို့မ ရဲစခန်းတွင် (ပ) ၄၃၆/၁၆၊ ရာဇသတ်ကြီး ပုဒ်မ- ၃၀၂/၃၂၆ အရ စစ်ဆေးလျက်ရှိကြောင်း သိရသည်။      
Writer: ထွန်းနေလှိုင် (နောင်ပိန်)

Eleven Media Group
http://www.news-eleven.com/

ဖားကန့် မိုးကောင်းလမ်း ယာယီပိတ်ထားလိုက်ပြီ

ကချင်ပြည်နယ် ဖားကန့်ကျောင်စိမ်းတွင်းကို သွားတဲ့ မိုးကောင်း-ဖားကန့် လမ်းကို ၇.၁၁.၂၀၁၆ နေ့ နံက် ၁၁:၃၀ အချိန်က စပြီး လမ်းကို ယာယီ ပိတ်ထားတယ်လို့ သိရပါတယ်။

ဘာကြောင့် ခုလိုလမ်းတွေ ပိတ်လိုက်ရတယ်ဆိုတာကို “ ဖားကန့်မြို့နဲ့ (၁၄) ခန့်ဝေးတဲ့ တံတားညီနောင် ရွာနဲ့ ပျားအုံကြားမှာ ၇.၁၁.၂၀၁၆နေ့ နံက် ၇:၀၀နာရီလောက်က KIA အယောက် (၂၀) လောက်က ဖားကန့် မိုးကောင်း အတက်အဆင်း ကားတွေကို ငွေကောက်နေတယ်လို့သိရတယ်ဗျ ။ဒါကြောင့် နန့်ယား နဲ့ နန့်တိမ်းမှာရှိတဲ့ စကခ ( ၇) ကွပ်ကဲမှုအောက်မှာရှိတဲ့ တပ်တွေက လမ်းကိုယာယီ ပိတ်ထားလိုက်တာပါ ”လို့ ဖားကန့်မြို့ အုပ်ချုပ်ရေးပိုင်းမှ တာဝန်ရှိသူတဦးက ပြောပြခဲ့ပါတယ်။

ခရီးသည်တင်လိုင်းကားတစ်စီးကို ငါးသောင်းနှုန်း KIA မှ ကောက်ခံနေတာလို့လည်း သိရပါသည်။

“KIA က ပိုက်ဆံကောက်တာက ကျောက်ဖျာနဲ့ ငါမိုင်ကြားမှာ ကောက်တာဗျ။ ခရီးသည်တင်ကားတွေတော့ တစ်စီး ငါးသောင်းနှုန်း ကောက်တာဗျ။ကုန်ကားတွေတော့ တစ်သိန်းကျော်မယ်ထင်တယ်ဗျ အဲဒါတော့အတိအကျမသိဘူး”လို့ အမည်မဖော်လိုတဲ့ မြစ်ကြီးနားမြို့မှ လိုင်းကားမောင်းသူတဦးက ပြောပါတယ်။

ဖားကန့် မိုးကောင်းလမ်းတလျှောက်တွင် မြန်မာ့တပ်မတော်နှင့် ကချင်လွတ်မြောက်ရေးတပ်မတော် KIA တို့ စစ်ပွဲများ စတင်ဖြစ်ပွားချိန်၂၀၁၂ မှ စတင်ပြီး ဖားကန့် မိုးကောင်း လမ်ကြောပေါ်တွင် ပြေးဆွဲနေသော မော်တော်ယဉ် မျိုးစုံကို KIA မှ ရံဖန်ရံခါ ငွေကြေးကောက်ခံတာမျိုးတွေ ရှိနေခဲ့ပြီး မြန်မာစစ်တပ်မှလည်း လုံခြုံရေးအကြောင်းပြကာ ကာမိုင်း မြို့အဝင် နှင့် နန့်တိမ်း ကျေးရွာတို့ မော်တော်ယဉ်မျိုးစုံအပေါ် နေ့စဉ် ငွေကြေးကောက်ခံတာတွေလည်း ရှိကြောင်း သိရပါတယ်။

ယခုလို မော်တော်ကားလမ်းများ ပိတ်ဆိုတာနဲ့ပတ်သက်ပြီး မဲဆန္ဒရှင်ပြည်သူတွေနဲ့ ကွင်းဆင်းတွေ့ဆုံရန် သွားရောက်ရင်း လမ်းကြောတွင် ပိတ်မိနေသည့် ပြည်သူ့ လွှတ်တော်ကိုယ်စားလှယ် ဦးတင်စိုးအား ဆက်သွယ်မေးမြန်းခဲ့ရာ “ဟုတ်တယ် ငါ့ညီရေ။ အကိုက ဂေါ်ရီမှာ လူထုနဲ့တွေ့ဆုံပွဲ လုပ်ပြီးပြန်ခဲ့တာ ခုကာမိုင်းမှာ ပိတ်မိနေပြီ ။ကိုလှဆိုင်း ( ပြည်နယ်လွှတ်တော်ကိုယ်စားလှယ် ဦးဒါရှီလှဆိုင်း ) က နန့်ယားမှာ ပိတ်မိနေတယ် "လို့ အတည်ပြုပြောကြားခဲ့ပါတယ်။ နန့်ယားကျေးရွာတွင် ပိတ်မိနေသော ပြည်နယ်လွှတ်တော်ကိုယ်စားလှယ် ဦးဒါရှီလှဆိုင်းကို လက်ရှိအခြေအနေကို သိရှိနိုင်ဘို့ ဆက်သွယ်ခဲ့ပေမဲ့ မရခဲ့ပါဘူး ။

ဇော်မိုးထက်

News Watch ( စောင့်ကြည့်သတင်းဂျာနယ် )
https://www.facebook.com/NewsWatchJournal/

မစင်ကို လောင်စာဆီအဖြစ် ပြောင်းလဲနိုင်ပြီဟုဆို

ဝါရှင်တန်၊ နိုဝင်ဘာ ၆

လူသားတို့ စွန့်ထုတ်လိုက်သည့် မစင်များကို အနာဂတ်တွင် လောင်စာဆီအဖြစ် ပြန်လည်အသုံးပြုနိုင်မည့် နည်းကို အမေရိကန်ပြည်ထောင်စုမှ ပညာရှင်များက ရှာဖွေတွေ့ရှိထားပြီ ဖြစ်ကြောင်း AP သတင်းတွင် ဖော်ပြထားသည်။

မစင်ကို လောင်စာဆီအဖြစ် ပြောင်းလဲခြင်းအား  အမေရိကန်ပြည်ထောင်စု Pacific Northwest National Laboratory စွမ်းအင်ဌာနမှ ပညာရှင်များက ရှာဖွေတွေ့ရှိခဲ့ခြင်း ဖြစ်ကြောင်း ယင်းသတင်းက ဆိုသည်။

လူသားမစင်ကို ရေနံကဲ့သို့သော လောင်စာဆီ ဖြစ်စေရန် ပြုလုပ်သည့်စနစ်မှာ မြေလွှာထဲတွင် လောင်စာဆီများကို ဖိအားပေးပြီး ရေနံကဲ့သို့ ဖြစ်စေရန် ဆောင်ရွက်သည့်အတိုင်း ဖြစ်ကြောင်း၊ ယင်းနည်းစနစ်ကို hydrothermal liquefaction နည်းဟု ခေါ်ကြောင်း ပညာရှင်များက ပြောကြားသည်။

အမေရိကန်ပြည်ထောင်စုတွင်ပင် နေ့စဉ် မစင်ပေါင်း ၃၄ ဘီလီယံ ဂါလန်ခန့် စွန့်ထုတ်နေရကြောင်း၊ ယင်းပမာဏကို လောင်စာဆီအဖြစ် ပြန်ချက်မည်ဆိုလျှင် လောင်စာစည်ပေါင်း သန်း ၃ဝ ခန့် ရနိုင်သဖြင့် အနာဂတ်လောင်စာ အတွက် များစွာ အကျိုးပြုနိုင်ကြောင်း ပညာရှင်များက ပြောကြားသည်။

လူသားတို့ စွန့်ထုတ်လိုက်သော မစင်များကို အပူချိန်မြင့်မားစွာ ပေးပြီးနောက် ဖိအားဖြင့် ထိန်းချုပ်ခြင်းဖြင့် လောင်စာအဖြစ် အမြန်ဆုံး ထုတ်ယူနိုင်သည့် စနစ်တစ်ခုအဖြစ် ပညာရှင်များက ဖော်ထုတ်ပြသနိုင်ခဲ့သည်။

မစင်များကို တစ်လက်မပတ်လည်လျှင် ပေါင် ၃ဝဝဝ ခန့်အထိ သက်ရောက်စေနိုင်သော ဖိအားကို ပေးပြီးလျှင် အပူချိန်မှာလည်း ၆၆ဝ ဒီဂရီ ဖာရင်ဟိုက်အထိ ပေးနိုင်မှသာ လောင်စာဆီအဖြစ် ကုန်ကြမ်းကို ထုတ်နိုင်မည်ဖြစ်သည်။

လူသားတို့၏ မစင်များကို အနှစ်အဖြစ် ထုတ်ယူကာ လောင်စာဆီအဖြစ် ပြန်ချက်နိုင်ရုံမက ပြုပြင်ထားသည့် အနှစ်များကို ဇီဝမြေသြဇာအဖြစ် စိုက်ခင်းများတွင် အသုံးပြုခြင်း၊ ဓာတုဆေးများဖြင့် ရောစပ်ပြီး အခြားစွမ်းအင်အဖြစ် ပြောင်းလဲအသုံးပြုနိုင်ခြင်းတို့ကို ပညာရှင်များက ဖော်ထုတ်ပြသနိုင်ခဲ့ကြသည်။

လူတစ်ယောက် စွန့်ထုတ်လိုက်သည့် မစင်အညစ်အကြေးများသည် တစ်နှစ်လျှင် လောင်စာဆီ နှစ်ဂါလန်မှ သုံးဂါလန်အထိ ထုတ်ယူနိုင်ပြီး၊ မစင်တွင် ပါဝင်သည့် ဖော့စဖော့ရပ်ကို သီးခြားထုတ်နိုင်လျှင် အနာဂတ်တွင် သီးခြားတွင်းထွက်တစ်ခု အနေနှင့် ထုတ်ယူရန်ပင် မလိုတော့ပေ။

လူတို့အသုံးပြုသည့် အိမ်သာသုံး စက္ကူများကလည်း မစင်များကို အနည်အနှစ် လုပ်ရာတွင် အထောက်အကူပေးရုံမက လောင်စာဆီချက်ရာတွင်ပါ များစွာ အကျိုးသက်ရောက်ကြောင်း၊ မစင်ထုတ် ဓာတ်ဆီ၊ ဒီဇယ်ဆီနှင့် လေယာဉ်ဆီများကို မကြာသောကာလတွင် ဈေးကွက်ဝင်စေရန် ထုတ်နိုင်တော့မည်ဖြစ်ကြောင်း AP သတင်းတွင် ရေးသားထားသည်။

The Voice
http://thevoicemyanmar.com/

တောင်ကြီးမြို့ မဲသောင်းကျေးရွာ၌ အသက် ၆ နှစ်အရွယ် မိန်းကလေးငယ်အား အဓမ္မကျင့်မှု ဖြစ်ပွား

ရှမ်းပြည်နယ်တောင်ပိုင်း တောင်ကြီးမြို့နယ် နောင်လေကျေးရွာအုပ်စု မဲသောင်းကျေးရွာတွင် အသက် (၆) နှစ် အရွယ် မိန်းကလေးငယ်တစ်ဦးအား မိခင်ဖြစ်သူဈေးဝယ်သွားစဉ် နေအိမ်အနီးနေထိုင်သူက အဓမ္မပြုကျင့်ပြီး ပစ်ထားခဲ့မှု ဖြစ်ပွားကြောင်း မြို့မရဲစခန်းမှ သိရသည်။

“ဒီလိုအရွယ်မရောက်သေးတဲ့ ကလေးတွေအတွက် သေချာစောင့်ရှောက်ဖို့ အရမ်းလိုအပ်ပါတယ်။ အမေတွေက ဈေးတွေသွားချိန်မှာဆိုလည်း တကယ့်စိတ်ချရတဲ့သူရဲ့ လက်ထဲအပ်ခဲ့ပါ။ တစ်ယောက်တည်း ကလေးကို အိမ်မှာ မပစ်ထားပါနဲ့။ ကလေးအတွက် အန္တရာယ်ရှိနိုင်ပါတယ်”ဟု အမှတ် (၁) တောင်ကြီး မြို့မရဲစခန်းမှ စခန်းမှူး ဒုရဲမှူး အောင်ဇော်ထွန်းက Tachileik News Agency သို့ ပြောသည်။

ဖြစ်စဉ်မှာ နိုဝင်ဘာလ (၄) ရက်နေ့က သားသမီး သုံးဦးအား နေအိမ်အလုပ်သမားတန်းလျားတွင် ဆော့ကစားခိုင်းပြီး  မိခင်ဖြစ်သူက ဈေးသွားဝယ်စဉ် တဝန်းထဲနေ ကျော်အောင် (၃၄) နှစ်က ဆော့ကစားနေသော ကလေးငယ်များ အနက် အသက် (၆)အရွယ်ကလေးငယ်အား မုန့်ကျွေးမည်ဟု ခေါ်ဆောင်သွားကာ ကျေးရွာအနောက်ဘက် ပဲစိမ်းငုံခင်းအနီး ရေမြောင်းအတွင်းခေါ်၍ သားမယားအဖြစ် ပြုကျင့်ခဲ့ကြောင်း သိရသည်။

ကလေးငယ်ပျောက်ဆုံး၍ ကျေးရွာမှလိုက်ရှာရာ ရေမြောင်းအတွင်း ကော်ဇောဖျာစုတ်ဖြင့် ပတ်ထားလျှက် မိန်းမကိုယ်အင်္ဂါအတွင်းမှ သွေးထွက်နေပြီး သတိလစ်နေသည့် မိန်းကလေးအားတွေ့ရှိရ၍ တောင်ကြီးမြို့ စပ်စံထွန်းဆေးရုံမှ ဆေးစစ်ချက်ယူကာ အမျိုးသမီးဆေးရုံနှင့် ကလေးဆေးရုံသို့ ပို့ဆောင် ကုသလျှက်ရှိကြောင်း သိရသည်။

လက်ရှိတွင် ကျော်အောင်အား နယ်မြေရဲစခန်းတွင် (ပ)၅၄၄/၂၀၁၆ ရာဇသတ်ကြီးဥပဒေ ပုဒ်မ ၃၆၃ /၃၇၆ ဖြင့်  အမှုဖွင့် ဖမ်းဆီးအရေးယူထားကြောင်း သိရသည်။

သတင်း - နိုနို
Tachileik News Agency
http://www.tachileik.net

စစ်တွေ ဒကစ လက်နက်တိုက်တွင် ပေါက်ကွဲမှုဖြစ်

စစ်တွေ၊ နိုဝင်ဘာ ၇

ရခိုင်ပြည်နယ် အခြေစိုက် အနောက်ပိုင်း တိုင်းစစ်ဌာနချုပ် ကွပ်ကဲမှုအောက်ရှိ ဒေသကွပ်ကဲရေး စစ်ဌာနချုပ် (စစ်တွေ) ၏ ဋ္ဌာနချုပ်ဗဟိုကင်းတွင် ယနေ့ (နိုဝင်ဘာ ၇ ရက်) မွန်းလွဲ ၁၂ နာရီခွဲက ပေါက်ကွဲမှုတစ်ခု ဖြစ်ပွားခဲ့ကြောင်း ဗိုလ်မှူးအဆင့်ရှိ တပ်မတော်အရာရှိတစ်ဦးက အတည်ပြု ပြောကြားသည်။

ဒေသကွပ်ကဲမှု စစ်ဌာနချုပ် ဗဟိုကင်းရှိ လက်နက်များ ထားရှိသည့် ယမ်းတိုက်မှ ပေါက်ကွဲခဲ့ခြင်းဖြစ်ပြီး ပေါက်ကွဲသံများကြောင့် မီးသတ်ကားများ မွန်းလွဲ ၁ နာရီကျော်တွင် ဝင်ရောက်ငြှိမ်းသတ်နိုင်ခဲ့သည်။

“ပေါက်ကွဲသံတွေ ဆက်တိုက်ဘဲ ငါးကြိမ်လောက် ကြားလိုက်ရတယ်။ တော်တော်အသံကျယ်တယ်။ မီးသတ်ကား လေးစီးလည်း ပေါက်ကွဲမှုတွေကြောင့် ဘယ်သူမှ ဝင်လို့မရဘဲ မွန်းလွဲ ၁ နာရီလောက်ကမှ ဝင်လို့ရတယ်” ဟု ယင်းအနီးတွင် မျက်မြင်တွေ့ရှိခဲ့သည့် စစ်တွေဒေသခံ တစ်ဦးက ပြောကြားသည်။

လက်နက်များ ထားရှိသည့် အခန်းများထဲမှ အခန်းတစ်ခန်းအတွင်း ပေါက်ကွဲမှု ဖြစ်ပွားခဲ့ခြင်း ဖြစ်ပြီး၊ ယခုကဲ့သို့ ပေါက်ကွဲမှုမှာ ပြင်ပပယောဂကြောင့် မဟုတ်ဘဲ ရာသီဥတု ပြောင်းလဲမှုကြောင့် ပေါက်ကွဲခြင်း ဖြစ်နိုင်ကြောင်း၊ ပေါက်ကွဲမှု ဖြစ်ပွားရခြင်း အကြောင်းကို အတိအကျ မသိရှိရသေးသော်လည်းနှင့် ဒကစ ရဟတ်ယာဉ်ကွင်း အတွင်းမှ ရဟတ်ယာဉ်များကို ယာယီပြောင်းရွေ့ခဲ့ရကြောင်း ဗိုလ်မှူးအဆင့်ရှိ တပ်မတော်အရာရှိက ဆိုသည်။

ပေါက်ကွဲမှု ဖြစ်ပွားရခြင်းနဲ့ ပတ်သက်ပြီး ရခိုင်ပြည်နယ် အစိုးရအဖွဲ့ နယ်လုံဝန်ကြီး ဗိုလ်မှူးကြီး ထိန်လင်းထံ ဆက်သွယ်မေးမြန်းခဲ့သော်လည်း လက်ခံဖြေကြားခြင်း မရှိပေ။

The Voice
http://thevoicemyanmar.com/

တရုတ်ကုမ္ပဏီကို ကျောက်ဖြူဒေ သခံတွေ ဆန္ဒပြ

ပျက်စီးသွားတဲ့လယ်ယာမြေတွေကို ပြန်လည်ပြုပြင်ပေးဖို့ ကျောက်ဖြူမြို့ဒေသခံတွေ နိုဝင်ဘာလ ၆ ရက်နေ့ကဆန္ဒပြတောင်းဆိုနေစဉ်။ Photo: KRDA/ Facebook
ရခိုင်ပြည်နယ် ကျောက်ဖြူမြို့နယ်မှာ သဘာဝ ဓာတ်ငွေ့ပိုက်လိုင်းစီမံကိန်းကြောင့် ပျက်စီးသွားတဲ့ လယ် ယာမြေတွေကို ပြန်လည်ပြုပြင်ပေးဖို့ တရုတ် ကုမ္ပဏီဖြစ်တဲ့ CNPC ရုံးရှေ့မှာ ဒေသခံ ၁၀၀ ကျော်က မနေ့က ဆန္ဒပြတောင်းဆိုခဲ့ကြပါတယ်။

ပျက်စီးသွားတဲ့လယ်ယာမြေတွေကို ပြန်လည်ပြုပြင်ပေးဖို့ နှုတ်ကတိပေးထားတာတွေရှိပေမယ့် လက်တွေ့မှာ ဘာမှလုပ်ဆောင်ပေးတာမရှိတဲ့အတွက် အခုလိုတောင်းဆိုတာလို့ ဆန္ဒပြပွဲဦးဆောင်သူ တစ်ဦးဖြစ်တဲ့ ဒေါ်ကြည် ကြည်နှင်းကပြောပါတယ်။

ဆန္ဒပြသူတွေဟာ ပိုက်လိုင်းမြေယာမြေအရေးဖြေရှင်းပေး၊ CNPC ကုမ္ပဏီထွက်သွား၊ ဒေသခံတွေရဲ့ အခွင့်အရေး ကို လေးစားပါစတဲ့ စာတန်းတွေပါတဲ့ ဗီနိုင်းပိုစတာတွေကိုင်ဆောင်ပြီး CNPC ရုံးရှေ့ကို ချီတက်ဆန္ဒပြခဲ့ကြတာဖြစ် ပါတယ်။

ဆန္ဒပြတောင်သူတွေဟာ ကျောက်ဖြူမြို့နယ် ဂုံးချွိန်၊ အုန်းတော၊ လိပ်ခမော်စတဲ့ကျေးရွာတွေက ဖြစ်ပါတယ်။

မလကျွန်းကနေ မဒေးကျွန်းဘက်ကိုသွယ်တန်းထားတဲ့ ပိုက်လိုင်းကြောင့် ပြီးခဲ့တဲ့ ၂၀၁၂ ခုနှစ် မိုးရာသီလောက် ကစပြီး ပိုက်လိုင်းဝဲယာမှာရှိတဲ့ လယ်ယာမြေတွေကို ရွှံ့နွံတွေဖုံးလွှမ်းပြီး ပျက်စီးခဲ့တာပါ။

CNPC ကုမ္ပဏီက အဲဒီပျက်စီးသွားတဲ့ လယ်ယာမြေတွေအတွက် သီးနှံလျော်ကြေးတွေကို ၂၀၁၄ ခုနှစ်ထိပေးခဲ့ပြီး ၂၀၁၅ ခုနှစ်ကနေ သီးနှံလျော်ကြေးငွေပေးတာကို ရပ်ဆိုင်းခဲ့ပါတယ်။

အဲဒီနောက် CNPC ကုမ္ပဏီက လယ်ယာမြေတစ်ဧကကို ကျပ်သုံးသိန်းကျော်နဲ့ ၅ နှစ်စာအတွက် ၁၇ သိန်းကျော် ကို အပြီးသတ်တစ်ခါတည်းပေးပြီး အသင့်ပါလာတဲ့ စာချုပ်ပေါ်မှာ လက်မှတ်ရေးထိုးခိုင်းတာတွေရှိခဲ့ တာကြောင့် တောင်သူ ၂၀ ကျော်က အဲဒီအစီအစဉ်ကို ငြင်းဆန်ပြီး လယ်ယာမြေတွေကိုသာ နဂိုအတိုင်းပြန် လည်ပြုပြင်ပေးဖို့ တောင်းဆိုနေကြတာဖြစ်ပါတယ်။

ဓာတ်ငွေ့ပိုက်လိုင်းစီမံကိန်းကြောင့် ပျက်စီးသွားတဲ့လယ်ယာမြေတွေကို ပြန်လည်ပြုပြင်ပေးဖို့အတွက် CNPC ရုံးရှေ့မှာ ပြီးခဲ့တဲ့ မေလ ၂ ရက်နေ့ကလည်း ဒေသခံတွေ ဆန္ဒပြတောင်းဆိုခဲ့ကြပြီး အဲဒီတောင်းဆိုချက်တွေနဲ့ပဲ မနေ့က ဒုတိယအကြိမ်မြောက် ထပ်မံဆန္ဒပြတောင်းဆိုကြ တာဖြစ်ပါတယ်။

RFA Burmese
http://www.rfa.org/burmese

ရခိုင်တွင် တပ်မတော်သားများက အရပ်သားများကိုတိုက်ခိုက်ချေမှုန်းသည်ဆိုသည့် စွပ်စွဲချက် အထောက်အထားမရှိဟု ဒေါ်အောင်ဆန်းစုကြည် ပြော

 

ဂျပန်နိုင်ငံတွင် အလည်အပတ်ရောက်ရှိနေသော ဒေါ်အောင်ဆန်းစုကြည်က ရခိုင်ပြည်နယ်မြောက်ပိုင်းတွင် တပ်မတော်က အရပ်သားများကို တိုက်ခိုက်ချေမှုန်းနေသည်ဆိုသော စွပ်စွဲချက်များနှင့်ပတ်သက်၍ သက်သေအထောက်အထားမရှိကြောင်း နိုဝင်ဘာ ၄ ရက်နေ့က ပြောသည်။

“ဘယ်အရာအတွက် ဘယ်သူ့မှာတာဝန်ရှိတယ်ဆိုတာပြောဖို့ ပြည့်စုံလုံလောက်တဲ့အထောက်အထားမရှိဘဲ ဘယ်သူ့ကိုမှ မစွပ်စွဲမိဖို့ ကျွန်မတို့က အင်မတန် ဂရုစိုက်ပါတယ်။ ဘာတွေဖြစ်ခဲ့သလဲဆိုတာကို ကျွန်မတို့ စုံစမ်းမယ်။ လုပ်ထုံးလုပ်နည်းများအတိုင်း တရားဥပဒေနဲ့အညီ ဆောင်ရွက်မှာဖြစ်ပါတယ်”ဟု ဂျပန်အမျိုးသားစာနယ်ဇင်းကလပ်၌ သတင်းစာဆရာများနှင့်တွေ့ဆုံစဉ် ၎င်းက ပြောသည်။

မြန်မာနိုင်ငံအခြေစိုက် ပြည်ပသံရုံးများမှ သံအမတ်အချို့လည်း ရခိုင်ပြည်နယ် အခြေအနေနှင့်ပတ်သက်၍ ကွင်းဆင်းလေ့လာခဲ့ပြီးဖြစ်သဖြင့် ၎င်းတို့ထံမှ အစီရင်ခံစာများထွက်ရှိလာမည်ဖြစ်ကြောင်းလည်း ဒေါ်အောင်ဆန်းစုကြည်က ထောက်ပြပြောဆိုသည်။

“ဒီအစီရင်ခံစာကို လေ့လာဖတ်ရှုပြီးရင် အဲဒီ(ရခိုင်ပြည်နယ်)မှာ ဘာတွေဖြစ်နေသလဲဆိုတာနဲ့ပတ်သက်လို့ ပိုပြီးဘက်မျှတဲ့ အတွေးအမြင်တွေကို ရရှိပါလိမ့်မယ်”ဟု ၎င်းက ပြောသည်။

ဘင်္ဂါလီလက်နက်ကိုင်များက မောင်တောမြို့နယ်အတွင်းရှိ အမှတ် ၁ နယ်ခြားစောင့် ရဲကွပ်ကဲမှုဌာနချုပ်(ကျီးကန်းပြင်) ကို အောက်တိုဘာ ၉ ရက်နေ့က တိုက်ခိုက်ခဲ့သဖြင့် ရဲတပ်ဖွဲ့ဝင် ၉ ဦး သေဆုံးခဲ့ရသည်။ ယင်းဖြစ်စဉ်နှင့်ပတ်သက်၍ တပ်မတော်မှ နယ်မြေရှင်းလင်းရေးများ ဆောင်ရွက်ခဲ့ရာ ဘင်္ဂလီအမျိုးသမီးများ အဓ္ဓမပြုကျင့်ခံရသည်ဆိုသော အထောက်အထားမဲ့သတင်းများကို သတင်းဌာနအချို့က ရေးသားဖော်ပြခဲ့သည်။

ကုလသမဂ္ဂဌာနေ ညှိနှိုင်းရေးမှူး Ms Renata Dessalien အပါအ၀င်၁၀ ဦးပါ နိုင်ငံတကာသံတမန်အဖွဲ့သည် ရခိုင်ပြည်နယ်သို့ နိုဝင်ဘာ ၂ ရက်နေ့တွင် သွားရောက်ခဲ့ပြီး နိုဝင်ဘာ ၄ ရက်နေ့က ပြုလုပ်သောသတင်းစာရှင်းလင်းပွဲတွင် အဆိုပါဖြစ်စဉ်များ နှင့်ပတ်သက်၍ ခိုင်လုံသော အထောက်အထားမတွေ့ရှိခဲ့ကြောင်း ပြောကြားခဲ့သည်။

News Watch ( စောင့်ကြည့်သတင်းဂျာနယ် )
https://www.facebook.com/NewsWatchJournal/

အကြမ်းဖက်သမားများ၏ ပစ်ခတ်မှုကြောင့် ကျဆုံးခဲ့သည့် ရဲဒုတပ်ကြပ်ဈာပန ကျင်းပ

မောင်တောမြို့နယ် တောင်ပိုင်း နူရူလာ ရဲကင်းစခန်းကို နိုဝင်ဘာ ၃ ရက် ညနေပိုင်းက အကြမ်းဖက်သမား ၅ ဦး ဝင်ရောက်ပစ်ခတ်လို့ ကျဆုံးခဲ့ရတဲ့ ရှေ့တန်းရဲတပ်ရင်း ၂၂ က ရဲဒုတပ်ကြပ် မင်းမင်းစိုးရဲ့ ဈာပနအခမ်းအနားကို ဒီနေ့ မွန်းလွဲပိုင်းက ကျင်းပခဲ့ပါတယ်။

အခမ်းအနားမှာ အမျှပေးဝေတာ၊ ကျဆုံးရဲဘော်အလေးပြုတာ၊ အမိန့်ပြန်တမ်း ဖတ်ကြားတာတွေပြုလုပ်ပြီး မောင်တောသုဿာန်မှာ သင်္ဂြိုဟ်ခဲ့ပါတယ်။

နိုဝင်ဘာ ၃ ရက်နေ့ ပစ်ခတ်တိုက်ခိုက်မှုကြောင့် ၁ ဦးသေဆုံးပြီး ၁ ဦး ဒဏ်ရာရခဲ့ပါတယ်။ တိုက်ခိုက်သူကို ဖမ်းဆီးရမိတာ မရှိခဲ့ဘဲ ပစ္စတိုသေနတ် ၁ လက်၊ ပစ္စတိုအိတ် ၄ ခု၊ ဆိုင်ကယ် ၂ စီး၊ ဓာတ်ဆီဗုံးတစ်ခု အပစ်ခံရတဲ့ စခန်းရှေ့မှာ ရရှိခဲ့တယ်လို့ အစိုးရက သတင်းထုတ်ပြန်ထားပါတယ်။

သတင်းဓာတ်ပုံ – ကိုအောင်

ဒီဗွီဘီ
http://burmese.dvb.no/

ဘင်္ဂလီအမျိုးသမီး ၃၀ ကို မြန်မာ့တပ်မတော်က မုဒိမ်းကျင့်သည်ဟု သတင်းရေးသားသည့် Myanmar Times မှ နိုင်ငံခြား အမျိုးသမီး သတင်းထောက် အလုပ်မှ ထုတ်ပယ်ခံရ

(၎င်းသတင်းတွင် ဖော်ပြသော ဓာတ်ပုံ)

နိရဉ္စရာ၊ နိုဝင်ဘာ ၄

မြန်မာ တပ်မတော်မှ မောင်တောမြို့နယ် စစ်ဆင်ရေးအတွင်း ဘင်္ဂလီအမျိုးသမီး ၃၀ ကို မုဒိမ်းကျင့်သည်ဟု ဆိုကာ ရခိုင်ပရိုဂျက် ( Arakan Project) အမည်ခံ ဘင်္ဂလီ အရေး လူပ်ရှားနေသူ ခရစ်လီးဝါ ( Chris Lewa) ကို ကိုးကားပြီး သတင်းရေးသားသူ ရန်ကုန်အခြေစိုက် Myanmar times မှ နိုင်ငံခြားသူ သတင်းထောက် Fiona MacGregor သည် အလုပ်မှ ထုတ်ပယ်ခံခဲ့ရသည်ဟု သိရသည်။

The Guardian‎ သတင်းစာတွင် “Myanmar journalist says she was fired over story on military rape allegations” ခေါင်းစဉ်ဖြင့် သတင်းဖော်ပြရာတွင် အောက်တိုဘာလ ၂၇ ရက်နေ့က ဒါဇင်နှင့်ချီပြီး အတင်းဓမ္မပြုကျင့်ခံရသည့် သတင်း ရခိုင်တွင် ဖြစ်ပေါ် “Dozens of rapes reported in northern Rakhine state” သတင်းကြောင့် သူမအား အလုပ်မှ ထုတ်ပယ်လိုက်ကြောင်း သတင်းတွင် ဖော်ပြသည်။

သူမအလုပ်ဖြုတ်ခံရခြင်းမှာ အာဏာပိုင်များမှ Myanmar Times မှ လူကြီးများအား ဖိအားပေးရာမှ ထုတ်ပယ်ခြင်း ဖြစ်ကြောင်းဖြင့်လည်း သတင်းဖော်ပြသည်။

နိရဉ္စရာ

https://www.facebook.com/Narinjara

မြစ်ဝကျွန်းပေါ်နှင့် ရခိုင်ကမ်းရိုးတန်း မိုးသက်လေပြင်းကျနိုင်

မြစ်ဝကျွန်းပေါ်နဲ့ ရခိုင်ကမ်းရိုးတန်းတလျှောက် မိုးသက်လေပြင်းကျပြီး လှိုင်းကြီးနိုင်တယ်လို့ မိုးလေဝသဌာနက သတင်းထုတ်ပါတယ်။

ဒီနေ့ မွန်းလွဲ ၂ နာရီအချိန် ထုတ်ပြန်ချက်အရ ဘင်္ဂလားပင်လယ်အော်မှာ ဖြစ်ပေါ်နေတဲ့ မုန်တိုင်းငယ်ရဲ့ အရှိန်ကြောင့် မြစ်ဝကျွန်းပေါ်၊ ရခိုင်ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့မှာ မိုးသက်လေပြင်းများ ကျရောက်ပြီး လှိုင်းအသင့်အတင့်မှ လှိုင်းကြီးနိုင်တယ်လို့ သတင်းမှာ ဖော်ပြပါတယ်။

မုန်တိုင်းငယ်ရဲ့ လက်ရှိအခြေအနေမှာ အဝါရောင်အဆင့်ရှိပြီး မြန်မာနိုင်ငံဘက်သို့ ဦးတည်ရွေ့လျားမယ့် အခြေအနေ မရှိဘူးလို့လည်း သတင်းမှာ ဖော်ပြပါတယ်။

ဒီဗွီဘီ
http://burmese.dvb.no/

မောင်တောမြို့နယ် နိုရူလာရဲကင်းစခန်းရှေ့မှ အကြမ်းဖက်သမားများ ကိုင်ဆောင်သည့် ပစ္စတိုသေနတ် တစ်လက်နှင့် ခဲယမ်းအချို့ တွေ့ရှိ သိမ်းဆည်းရမိ

မောင်တော နိုဝင်ဘာ ၄

မောင်တောမြို့မှ အလယ်သံကျော်ကျေးရွာဘက်သို့အထွက် သုံးမိုင်ခန့်အကွာရှိ နိုရူလာရဲကင်းစခန်းမှ ကင်းစောင့်ရဲတပ်ဖွဲ့ဝင် နှစ်ဦးအား ယမန်နေ့ညနေက ပစ်ခတ်ထွက်ပြေးသွားခဲ့သည့် အကြမ်းဖက်သမားများ ဆုတ်ခွာရာနေရာများကို ယနေ့ နံနက်ပိုင်းတွင် ရဲတပ်ဖွဲ့ဝင်များက ထပ်မံရှင်းလင်းစဉ် အကြမ်းဖက်သမားများ ကိုင်ဆောင်သည့် ပစ္စတိုသေနတ်တစ်လက်နှင့် ယင်းကျည်အချို့ တွေ့ရှိသိမ်းဆည်းရမိခဲ့သည်။

ယမန်နေ့ ညနေ ၅ နာရီ မိနစ် ၅၀ ခန့်က နယ်ခြားစောင့် ရဲတပ်ဖွဲ့ဝင် ၁၁ ဦး တာဝန်ထမ်းဆောင်လျက်ရှိသည့် နိုရူလာရဲကင်းစခန်းရှေ့သို့ အလယ်သံကျော်ရွာမှ မောင်တောမြို့ ဘက်သို့ ဦးတည်မောင်းနှင်လာသော ဆိုင်ကယ် သုံးစီးဖြင့် အရပ်ဝတ်နှင့် အကြမ်းဖက်သမား ခြောက်ဦးခန့် ရောက်ရှိလာပြီး ကင်းစောင့်ရဲတပ်ဖွဲ့ နှစ်ဦးအား လက်နက်ငယ်ဖြင့် ရုတ်တရက် ပစ်ခတ်ထွက်ပြေးစဉ် ကင်းစခန်းရှိ ရဲတပ်ဖွဲ့ဝင်များက ပြန်လည် ပစ်ခတ်မှုကြောင့် အကြမ်းဖက်သမားအချို့ ဒဏ်ရာရရှိသွားပြီး ဆိုင်ကယ်များကျန်ရှိကာ ခြေကျင်ဆုတ်ခွာထွက်ပြေးသွား ခဲ့သည်။

“ကင်းစခန်းရှေ့ကို အရပ်ဝတ်အကြမ်းဖက်သမား ခြောက်ဦးက ဆိုင်ကယ်သုံးစီးနဲ့ ရောက်လာပြီး လက်နက်အတိ တွေနဲ့ အနီးကပ် စတင်ပစ်ခတ်ပါတယ်။ ကျွန်တော့်လူတွေ ထိပြီဆိုတာနဲ့တစ်ပြိုင်နက် ကျွန်တော်လည်း ကင်းစခန်းပေါ်က ချက်ချင်းတုံ့ပြန်ပစ်ခတ်ပါတယ်။ သူတို့ကလည်း ကင်းစခန်း အပေါက်ဝက တစ်ဦး၊ သစ်ပင်ဘေးက တစ်ဦးနဲ့ အခြား လေးဦး ကလည်း ကျွန်တော်တို့ ကင်းစခန်းထဲကို ပစ်ခတ်ပါတယ်။ ကျွန်တော် တို့အားလုံး အမြန်ဆုံး တုံ့ပြန်ပစ်ခတ်လို့ သူတို့တွေ ဆုတ်ခွာသွားပါတယ်။ အပြန်အလှန်ပစ်ခတ်မှု ငါးမိနစ် ခန့်ကြာပါတယ်။ ဆုတ်ခွာသွားတဲ့နောက်ကို ရဲတပ်ကြပ်ကြီးထွန်းဦးက ကိုက်အနည်းငယ်အကွာထိ လိုက်လံ ပစ်ခတ်ရှင်းလင်းခဲ့ပြီး နောက် တပ်မတော်က ၁၀ မိနစ်ခန့်မှာ ရောက်ရှိလာပြီး ဆုတ်ခွာ သွားသူတွေရဲ့နောက်ကို လိုက်လံရှင်းလင်းခဲ့ပါတယ်။ သူတို့ထဲက တစ်ဦး ဒဏ်ရာရရှိခဲ့တဲ့ သွေးကွက်တွေလည်း တွေ့ရှိခဲ့ရတယ်” ဟု နိုရူလာကင်းစခန်းမှူး ရဲအုပ်ကျော်မြင့်အောင်က ပြောသည်။

အဆိုပါဖြစ်စဉ်တွင် ကင်းစောင့်တာဝန်ကျရဲတပ်ဖွဲ့ဝင် ရဲဒုတပ်ကြပ်တစ်ဦး ကျဆုံးခဲ့ပြီး တပ်ကြပ်တစ်ဦးမှာ ရှပ်ထိ ဒဏ်ရာ(မစိုးရိမ်ရ)ရရှိခဲ့ကာ ရန်သူများဘက်မှ ဒဏ်ရာရရှိသွားသည့် သွေးကွက်များစွာကိုလည်း တွေ့ရှိခဲ့သည်။ ရန်သူ့ထံမှ ဆိုင်ကယ် သုံးစီး၊ ပစ္စတိုသေနတ်ထည့် အိတ်ခွံ လေးခု၊ သော့ချိတ် ဓာတ်မီးငယ် သုံးခု၊ သံဖြတ်ကိရိယာ (Cutter) နှစ်ခု၊ နာရီ ဓာတ်ခဲ သုံးလုံး၊ လက်လုပ် မီးလောင်ဗုံး ဓာတ်ဆီပုလင်း တစ်လုံး နှင့် ပစ္စတိုကျည်ခွံ ၁၃ ခုတို့ကို သိမ်းဆည်းရမိခဲ့သည်။

ယနေ့နံနက် ၇ နာရီခန့်တွင် ရဲတပ်ဖွဲ့ဝင်များက ဖြစ်စဉ် ဖြစ်ပွားခဲ့သည့် ရဲကင်းစခန်းရှေ့ကို ထပ်မံရှင်းလင်းစဉ် မြက်တောအတွင်းမှ USA စာတန်းပါ ပစ္စတိုသေနတ် တစ်လက်၊ ယင်းကျည်ကပ် နှစ်ခု၊ ကျည်ဆန် ငါးတောင့်နှင့် ကျည်ခွံ သုံးခုတို့ကို ထပ်မံတွေ့ရှိသိမ်းဆည်းရမိခဲ့ခြင်း ဖြစ်သည်။ အဆိုပါ အကြမ်းဖက်သမားများအား ဖော်ထုတ် ဖမ်းဆီးရမိချေမှုန်း နိုင်ရေး တပ်မတော်နှင့် နယ်ခြားစောင့်ရဲတပ်ဖွဲ့များ ပူးပေါင်း၍ ဆောင်ရွက်လျက်ရှိကြောင်း သတင်းရရှိသည်။

(သတင်းစဉ်)
MOI Webportal Myanmar
https://www.facebook.com/MOIWebportalMyanmar

မောင်တောမြို့နယ်တောင်ပိုင်း မြင်းလွှတ်မြို့တွင် နယ်ခြားစောင့် ကင်းစခန်းတစ်ခု မီးရှို့ဖျက်ဆီးခံရ

မောင်တောမြို့နယ် တောင်ပိုင်းမြင်းလွှတ်မြို့ ရွာသစ်ရပ်ကွက်တွင် နယ်ခြားစောင့် ကင်းစခန်းတစ်ခု နိုဝင်ဘာ ၄ ရက် နံနက် ၃ နာရီတွင် မီးရှို့ဖျက်ဆီးခံခဲ့ရကြောင်း သတင်းရရှိသည်။

“မီးလောင်တာကတော့ ဒီကနေ့ နံနက် ၂ နာရီခွဲ ၃ နာရီလောက်မှာ ဖြစ်တယ်လို့ နယ်ခြားစောင့်ရဲက သိရတယ်။ အခု မီးလောင်တဲ့ ရဲကင်းစခန်းက မြင်းလွှတ်မြို့ ဧရိယာထဲက ရွာသစ်ရပ်ကွက်မှာ တည်ရှိပါတယ်” ဟု မြင်းလွှတ်မြို့ အုပ်ချုပ်ရေးမှူးက ပြောကြားသည်။

 မီးရှို့ဖျက်ဆီးခံရသည့် ကင်းစခန်းသည် မောင်တောမြို့မှ ၁၈ မိုင်အကွာ မောင်တော - အငူမော် ကားလမ်းပေါ်တွင် တည်ရှိပြီး အောက်တိုဘာ ၉ ရက် အကြမ်းဖက်မှု ဖြစ်စဉ်အပြီးတွင် လုံခြုံရေး ရုပ်သိမ်းထားသည့် ကင်းစခန်းဖြစ်ကြောင်း သိရသည်။

“ကမ်းနားရွာသစ် ဆိုတာရှိတယ်။ အဲဒီကမ်းနားရွာသစ်နဲ့ မြင်းလွှတ်ကြားမှာ တံတားရှိတယ်။ တံတားရဲ့ တောင်ဘက်မှာရှိတဲ့ ကင်းစခန်း မီးလောင်တာ။ ကင်းစခန်းမှာ လုံခြုံရေးလည်း မရှိသလို လူတစ်ယောက်မှ လည်းမရှိဘူး” ဟု အင်းဒင်းကျေးရွာသား ဦးကျော်တင်က ပြောကြားသည်။

နိုဝင်ဘာ ၃ ရက်ညနေ ၅ နာရီ  မိနစ် ၅၀ ခန့်က မောင်တောနယ်တောင်ပိုင်း အလယ်သံကျော်သွားလမ်းပေါ်ရှိ မောင်တောမြို့နှင့် သုံးမိုင်ခန့်အကွာ ဘကုန်းနားကျေးရွာအုပ်စု နူရူလာကျေးရွာ နယ်ခြားစောင့်ကင်းစခန်း တစ်ခု ထပ်မံတိုက်ခိုက်ခံရပြီး ရဲဒုတပ်ကြပ်တစ်ဦး ကျဆုံးကာ ရဲတပ်ကြပ်တစ်ဦး ဒဏ်ရာရရှိခဲ့သည်။

ရဲတပ်ဖွဲ့က လိုက်လံရှင်းလင်းရာ ဆိုင်ကယ်သုံးစီးနှင့်အတူ ပစ္စတိုသေနတ်ထည့်သည့် သေနတ်မပါ အိတ်အလွတ် လေးအိတ်၊ ကျည်ခွံက ၁၃ ခုနှင့် လက်လုပ်မီးလောင်ဗုံးအဖြစ် အသုံးပြုသည့် ဓာတ်ဆီပုလင်းပိုင်း တစ်ခုသိမ်းဆည်း ရမိခဲ့ကြောင်း သိရသည်။

ယင်းဖြစ်စဉ်ပြီးနောက် နာရီပိုင်းအကွာတွင် ကင်းစခန်း မီးရှို့ခံရခြင်းဖြစ်သည်။ အောက်တိုဘာ ၉ ရက်က မောင်တောနယ်စပ်ရှိ နယ်ခြားစောင့် ရဲကွပ်ကဲမှု အဖွဲ့မှူးရုံး ဌာနချုပ် (ကျီးကန်းပြင်) အပါအ၀င် နယ်ခြားစောင့်စခန်း သုံးခု တိုက်ခိုက်ခံရပြီးနောက် ၂၃ ရက်အကြာ မောင်တောဒေသသို့ နိုဝင်ဘာ ၂ ရက်နှင့် ၃ ရက်တို့တွင် နိုင်ငံတကာ သံတမန်များ လာရောက် လေ့လာခဲ့ပြီးနောက် နာရီပိုင်း အကြာတွင် ယင်းသို့ အကြမ်းဖက် တိုက်ခိုက်မှုများ ထပ်မံဖြစ်ပွား လာခြင်းဖြစ်သည်။

မြင်းလွှတ်မြို့တွင် ရခိုင်တိုင်းရင်းသားများ နေထိုင်ခြင်း မရှိဘဲ ဘင်္ဂါလီများသာ နေထိုင်သောမြို့ ဖြစ်ကြောင်း၊ ၂၀၁၅ ခုနှစ်မှ မြို့အဖြစ် သတ်မှတ်ခြင်းဖြစ်ကြောင်း သိရသည်။ အောက်တိုဘာ ၉ ရက်က နယ်ခြားစောင့် စခန်းများ အကြမ်းဖက် တိုက်ခိုက်ခံရသည့် ဖြစ်စဉ်အပြီးနောက်တွင် အဆိုပါ မြင်းလွှတ်မြို့၌ အထွေထွေ အုပ်ချုပ်ရေးမှူးရုံးလည်း ပိတ်ထားပြီး ဌာနဆိုင်ရာရုံး၊ ကျောင်း၊ ဆေးပေးခန်းများလည်း ပိတ်ထားရကြောင်း သိရသည်။          
                  
Writer: သားရွှေဦး (ကစ္ဆပ)

Eleven Media Group
http://www.news-eleven.com/

မဟာဗန္ဓုလလမ်းပေါ်မှာ မော်တော်ယာဉ် မီးလောင်မှု ဖြစ်ပွား

ဓါတ်ပုံ - Htoo Htoo khin
ရန်ကုန် နိုဝင်ဘာ ၄

ယနေ့ နံနက် ၇ နာရီ ၄၅ မိနစ်အချိန်တွင် အမှတ် (၂) ရပ်ကွက် မဟာဗန္ဓုလ လမ်းနှင့် (၅၃) လမ်းထိပ်၊ မဟာဗန္ဓုလ လမ်းအတိုင်း အရှေ့မှ အနောက် သို့ မောင်းနှင်လာသော ယဉ်အမှတ် AA-8329 Probox ခဲရောင် အငှား ယာဉ်သည် ဆီပိုက် ပြုတ်ထွက်၍ အင်ဂျင်ခန်းပေါ်ကျပြီး မီးလောင် ကျွမ်းမှု ဖြစ်ပွားခဲ့ပါသည်။

အဆိုပါမောင်တော်ယာဉ် မီးလောင်မှု ဖြစ်ပွားရာ နေရာသို့ မြို့နယ် မီးသတ် ဦးစီးမှူး ဦးကျော်လွင် ဦး ဦးစီး၍ မီးသတ်တပ်ဖွဲ့ဝင်များ မြို့မ မေတ္တစခန်းမှူး ရဲအုပ် မျိုးသန့် ဦးစီးတပ်ဖွဲ့ဝင်များ ၊ အမှတ်(၂) ရပ်ကွက် အုပ်ချုပ်ရေးမှူး ဦးအောင်ဝင်း ပါအဖွဲ့ဝင်များမှ မီးသတ်ယာဉ် (၂) စီးဖြင့် မီးငြှိမ်းသတ်ခဲ့သည်။ အငှားယာဉ်မောင်းမှာ ထွက်ပြေးတိမ်းရှောင်သွားခဲ့ကြောင်း သိရှိရသည်။

မီးလောင်မှုကြောင့် ယာဉ်ရှေ့ခန်း ပျက်စီးဆုံးရှုံးခဲ့သည်။ မီးလောင်မှုဖြစ် စဉ်နှင့် ပတ်သက်၍ ပုဇွန်တောင်မြို့မ ရဲစခန်းတွင် အမှုဖွင့် အရေး ယူဆောင်ရွက် လျှက်ရှိကြောင်း သတင်းရရှိသည်။

ပုဇွန်တောင် (ပြန်/ဆက်)
MOI Webportal Myanmar
https://www.facebook.com/MOIWebportalMyanmar/

ကျိုင်းတုံတွင် ကျပ်သိန်း၂၅၀၀တန်ဖိုးရှိ ICEမူးယစ်ဆေးဝါးများဖမ်းမိ

ရှမ်းပြည်နယ်(အရှေ့ပိုင်း)ကျိုင်းတုံမြို့ အမှတ်(၅)ရပ်ကွက်မြို့အဝင် နောင်ဖာရဲကင်းတွင် ယနေ့(နိုဝင်ဘာ၎ရက်) မွန်းလွဲ၁နာရီက မော်တော်ယာဉ်တစ်စီးပေါ်မှ ကျပ်သိန်း၂၅၀၀တန်ဖိုးရှိ ICEမူးယစ်ဆေးဝါးများ ဖမ်းဆီးရမိကြောင်း ကျိုင်းတုံမြို့ အမှတ်(၂၈)မူးယစ်တပ်ဖွဲ့စုမှူးရုံးထံမှ စုံစမ်းသိရှိရသည်။

အဆိုပါနေ့ရက်က မိုင်းယန်း-မိုင်းခတ်-ကျိုင်းတုံလမ်းအတိုင်း ကျိုင်းတုံမြို့တွင်းသို့ မောင်းနှင်လာသည့် ပရိုဗောက်ယာဉ်ကို ပူးပေါင်းအဖွဲ့ဖြင့်စစ်ဆေးရာမှ တစ်ကီလိုလျှင်ကျပ်သိန်း၂၅၀တန်ဖိုးရှိ ICEမူးယစ်ဆေးဝါး ၁၀ထုပ် (၁၀ကီလို) ဖမ်းဆီးရမိခြင်းဖြစ်ကြောင်း ယင်းတပ်ဖွဲ့စုမှူး ဒုရဲမှူးဇော်ဝင်းထွန်းက ပြောကြားသည်။

"မူးယစ်ဆေးဝါးတွေကို ကားရှေ့တံခါးကြားတွေထဲ သိုဝှက်သယ်ဆောင်လာတာ။ ကားကမိုင်းယန်းကနေ တာချီလိတ်အထိ ပြေးဆွဲနေတဲ့အဌားကားပါ။ မူးယစ်ဆေးဝါးတွေကို "ဝ"အထူးဒေသ(၂) မိုင်းဖျန်မြို့ကနေတာချီလိတ်ကို အခကြေးငွေနဲ့သယ်ဆောင်လာတာလို့ အဌားယာဉ်မောင်းက ထွက်ဆိုတယ်"ဟု ၎င်းကဆိုသည်။

ယင်းဖြစ်စဉ်နှင့်ပတ်သက်၍ အသက်၃၈နှစ်အရွယ် စိုင်းလှအွမ်ကိုမယ(ပ)၁၄၅/၂၀၁၆၊မူး/ စိတ်ပုဒ်မ-၁၅/၁၉(က)/၂၀(က)အရ အမှုဖွင့်အရေးယူထားပြီး ကွင်းဆက်တရားခံများ ဖမ်းဆီးရမိရန် စုံစမ်းစစ်ဆေး နေကြောင်း ကျိုင်းတုံမြို့မ ရဲစခန်းထံမှသိရသည်။

The Voice
http://thevoicemyanmar.com

ပဲခူးတိုင်းဝန်ကြီးချုပ်နဲ့ ဝန်ကြီး ၂ ဦးကို ဆန္ဒပြ

ပဲခူးတိုင်းဝန်ကြီးချုပ်နဲ့ တိုင်းအစိုးရအဖွဲ့ဝန်ကြီး နှစ်ဦး ရာထူးကနေ နှုတ်ထွက်ပေးဖို့ ပဲခူးတိုင်းဒေသကြီး၊ သာယာဝတီမြို့မှာ နိုဝင်ဘာလ ၄ ရက်နေ့က ဆန္ဒပြတောင်းဆိုစဉ်။ Photo: Tun Win
ပဲခူးတိုင်းဝန်ကြီးချုပ် ဦးဝင်းသိန်းနဲ့ တိုင်းအစိုးရအဖွဲ့ဝန်ကြီး နှစ်ဦး ရာထူးကနေ နှုတ်ထွက်ပေးဖို့အတွက် ပဲခူးတိုင်းဒေသကြီး၊ သာယာဝတီမြို့မှာ ဒေသခံ ၆၀ လောက်က ဒီကနေ့ ဆန္ဒပြတောင်းဆိုကြပါတယ်။

ပဲခူးတိုင်းဝန်ကြီးချုပ်နဲ့ တိုင်းဝန်ကြီးတွေ ဆောင်ရွက်ပေးရမယ့် တာဝန်တွေ ပျက်ကွက်တဲ့အတွက် နှုတ်ထွက်ပေးဖို့ ဆန္ဒပြတောင်းဆိုတာဖြစ်တယ်လို့ ဆန္ဒပြပွဲကို ဦးဆောင်သူ  ဦးထွန်းဝင်းက ပြောပါတယ်။

"နံပါတ် တစ်အချက် အဓိက နစ်နာမှုရှိတာကတော့ အလုပ်မလုပ်တဲ့အတွက် မြို့ရွာစည်ပင် မသာယာဘူး။ ရေနစ်တယ်။ နံပါတ် နှစ်အချက် ဈေးသည်လေးတွေ ဒုက္ခရောက်တယ်။ နံပါတ်သုံး အချက်ကတော့ ပဲခူးရိုးမကတော့ တောတွေက ပြုန်းတီးနေပြီ။ ဆင်တွေလည်း အသတ်ခံရတယ်။ အဲတော့ ဒီဝန်ကြီးမျိုးကတော့ မရှိတာပဲ ကောင်းတဲ့သဘောရှိတယ်။" လို့ ပြောပါတယ်။

ပဲခူးတိုင်းအစိုးရအဖွဲ့ သစ်တောရေးရာဝန်ကြီး ဦးကျော်မင်းစံက ဆန္ဒပြသူတွေ စွပ်စွဲသလို ဝန်ကြီးတွေအနေနဲ့ တာဝန်ပျက်ကွက်တာတွေမရှိဘဲ ကြိုးစားလုပ်ဆောင်နေတဲ့အကြောင်း အခုလို ပြောပါတယ်။

"အလုပ်မလုပ်ဘူးဆိုတာကတော့ မဟုတ်ဘူးဗျ။ ကျွန်တော်တို့က နေ့တိုင်းကို လုပ်နေတာ။ ပြောရ ရင်တော့ ပိတ်ရက်တွေပါ အများသောအားဖြင့် ကျွန်တော်တို့က သွားပြီးလုပ်နေတာပါ။ ဆိုလိုတာက သစ်တောတွေ ပြုန်းတီးတယ်ဆိုတဲ့ စွပ်စွဲချက်မျိုးဆိုရင် ကျွန်တော်တို့မှာ တိကျခိုင်မာတဲ့ အချက် အလက်တွေရှိတယ်နော်။ အလုပ်မလုပ်ဘူးဆိုတာတော့ လုံးဝမဟုတ်ဘူးဗျ။ ကျွန်တော်တို့က နေ့တိုင်းကို အလုပ်လုပ်နေတာ။ အစိုးရအဖွဲ့လည်း ဒီအတိုင်းပဲ။ ၀န်ကြီးချုပ်ဆိုလည်း နားတောင်မနားဘူး။ သူတောက်လျှောက်သွားပြီးလုပ်နေတာ" လို့ ပြောပါတယ်။

ဒါ့အပြင် ဆန္ဒပြတာဟာ ပြည်သူတွေရဲ့ အခွင့်အရေးဖြစ်တဲ့အတွက် ဆန္ဒထုတ်ဖော်ပြီးထောက်ပြသလို အစိုးရအဖွဲ့ရဲ့ တိုင်းပြည်ဖွံ့ဖြိုးရေး လုပ်ငန်းစဉ်တွေမှာ ပြည်သူတွေအနေနဲ့ ပူးပေါင်းပါဝင်ဖို့လိုတယ်လို့လည်း ၀န်ကြီး ဦးကျော်မင်းစံက ပြောပါတယ်။

ဆန္ဒပြသူတွေဟာ ပဲခူးတိုင်းဒေသကြီး ၀န်ကြီးချုပ် ဦးဝင်းသိန်းနဲ့ စည်ပင်သာယာရေးဝန်ကြီး ဦးမောင်မောင်လွင်၊ သစ်တောရေးရာဝန်ကြီး ဦးကျော်မင်းစံတို့ကို နှုတ်ထွက်ပေးဖို့ တောင်းဆိုကြတာဖြစ်ပါတယ်။

ဆန္ဒပြသူတွေအနေနဲ့ ဒီတစ်ကြိမ် ဆန္ဒပြတောင်းဆိုမှု မအောင်မြင်ရင် ပဲခူးမြို့ပေါ်နဲ့ နေပြည်တော်တို့အထိ ဆန္ဒပြတောင်းဆိုသွားမယ်လို့ ပြောပါတယ်။

ဆန္ဒပြသူတွေထဲမှာ သာယာဝတီမြို့ခံ လယ်သမားတွေနဲ့ ဈေးသည်တွေ အများစု ပါဝင်ကြပါတယ်။

RFA Burmese
http://www.rfa.org/burmese

မောင်တောနယ်ခြားစောင့်တပ် ကွပ်ကဲရေးမှူးဟောင်းကို အရေးယူရန် အကျယ်ချုပ်ချ

နိရဉ္စရာ၊ နိုဝင်ဘာ ၄

မောင်တောမြို့နယ် အမှတ်(၁) နယ်ခြားစောင့်ရဲတပ်ဖွဲ့ ကွပ်ကဲရေးဌာနချုပ် ကွပ်ကဲရေးမှူး ရဲမှူးချုပ်ဟောင်း မောင်မောင်ခိုင်အား စစ်ဆေးမေးမြန်း အရေးယူရန် အကျယ်ချုပ် ချထားလိုက်ပြီဟု သတင်းရရှိသည်။

မောင်တောမြို့နယ်မှ နယ်ခြားစောင့် စခန်း သုံးခု တိုက်ခိုက်ခံရပြီးနောက် လုံခြုံရေးဆိုင်ရာ သုတေသန စစ်တမ်း ပြုလုပ် ခဲ့ပြီးနောက် ယခုလို အရေးယူရန် အကျယ်ချုပ်ချထားလိုက်ခြင်း ဖြစ်သည်ဟု နိုင်ငံတော် သမ္မတရုံး အကြီးတန်း အရာရှိကြီး တစ်ဦးက ပြောကြောင်း ဘီဘီစီ (မြန်မာပိုင်း)က နိုဝင်ဘာ ၃ ရက်နေ့ ညနေပိုင်းက သတင်း ကြေညာသည်။

ရဲမှူးချုပ်ဟောင်း မောင်မောင်ခိုင်သည် အောက်တိုဘာ ၉ ရက်နေ့ နယ်ခြားစောင့် စခန်းများ တိုက်ခိုက်ခံရချိန်က မင်းပြားမြို့နယ်သို့ ရောက်ရှိနေကြောင်း သိရသည်။

ယခုအခါ ၎င်း၏ နေရာတွင် အမှတ်(၁) နယ်ခြားစောင့်ရဲတပ်ဖွဲ့ ကွပ်ကဲရေးဌာနချုပ် ကွပ်ကဲရေးမှူး အဖြစ် ရဲမှူးချုပ် သူရစန်းလွှင်ကို အစားထိုး ခန့်အပ်ထားလိုက်ပြီ ဖြစ်သည်။

နိရဉ္စရာ
http://www.narinjara.com/burmese

မောင်တောမြို့နယ် ဝါးပိတ်ကျေးရွာ၏ ခြံဝင်းတစ်ခုအတွင်းမှ လက်နက်ခဲယမ်းများ တူးဖော်ရရှိ

နေပြည်တော် နိုဝင်ဘာ ၃

ရခိုင်ပြည်နယ် မောင်တောမြို့နယ်အတွင်း တပ်မတော်စစ်ကြောင်းများနှင့် နယ်ခြား စောင့်ရဲတပ်ဖွဲ့ဝင်များပါဝင်သော ပူးပေါင်းအဖွဲ့သည် နယ်မြေလုံခြုံရေးဆောင်ရွက် စဉ် ယနေ့နံနက် ၁ဝ နာရီခွဲခန့်က ဝါးပိတ်ကျေးရွာ၏ အနောက်ဘက် လူမနေသည့် ခြံဝင်းတစ်ခုအတွင်းရှိ စိုက်ခင်းဟောင်းနေရာ၌ မြေသားများပွနေသည်ကို မသင်္ကာ ဖွယ်တွေ့ရှိသဖြင့် တူးဖော်ခဲ့ရာ ဘီအေ ၉၄ သေနတ်လေးလက်နှင့် ယင်းကျည်အိမ် သုံးခု၊ အမ်အေ ၁၁ တစ်လက်နှင့် ယင်းကျည်အိမ်နှစ်ခု၊ ၉မမ ကျည်အတောင့် ၂ဝ တို့ကို တူးဖော်တွေ့ရှိခဲ့သည်။

အဆိုပါ လက်နက်ခဲယမ်းများသည် မောင်တောမြို့နယ်နှင့် ရသေ့တောင်မြို့နယ် များရှိ နယ်ခြားစောင့်ရဲတပ်ဖွဲ့ဌာနချုပ်နှင့် ကွပ်ကဲမှုအောက်ရှိ ကင်းစခန်းများအား အောက်တိုဘာ ၉ ရက်က အကြမ်းဖက်စီးနင်းတိုက်ခိုက်သူများ စီးနင်းတိုက်ခိုက်စဉ်ပါရှိသွားသော လက်နက်ခဲယမ်းများဖြစ်ပြီး အဆိုပါနေရာတစ်ဝိုက်အား တပ်မတော် စစ်ကြောင်းက နယ်မြေရှင်းလင်းရေးလုပ်ငန်းများ ဆက်လက်ဆောင်ရွက်လျက်ရှိ ကြောင်း သတင်းရရှိသည်။

(မြဝတီ)
မြန်မာ့အလင်း
https://www.facebook.com/MYANMAALINNNEWS/

မုံရွာ ကံသာဦးရပ်ကွက် နှစ်လောင်းပြိုင် လူသတ်မှု တရားခံဟု ယူဆရသူကို ဖမ်းဆီး

မုံရွာမြို့ ကံသာဦးရပ်ကွက် သမာဓိလမ်းတွင် ဖြစ်ပွားခဲ့သော နှစ်လောင်းပြိုင်လူသတ်မှုနှင့် ပတ် သက်၍ တရားခံဟု ယူဆရသော အသက် (၂၀) အရွယ် အမျိုးသား တစ်ဦးကို ဖမ်းဆီးရမိခဲ့ကြောင်း မုံရွာမြို့ နယ်မြေရဲတပ်ဖွဲ့စခန်းမှ သတင်းရရှိသည်။

မုံရွာမြို့ အောင်ချမ်းသာရပ် ကွက်နေ အမျိုးသားကို နိုဝင်ဘာ ၂ ရက်က စစ်ကိုင်းမြို့အ၀င်တွင် ဖမ်းဆီးရမိခဲ့ပြီး မွန်းလွဲပိုင်း၌မုံရွာမြို့နယ်မြေရဲတပ်ဖွဲ့စခန်း တာဝန်ရှိသူများထံသို့ လွှဲပြောင်းပေးအပ်ခဲ့ခြင်းဖြစ်သည်။

‘‘လူသတ်မှုဖြစ်စဉ်မှာ အသုံး ပြုခဲ့တဲ့ ဓားက အောင်ချမ်းသာရပ် ကွက်ထဲက တရားခံနေအိမ် အိမ် သာကျင်းထဲပစ်ချထားလို့ စည်ပင်အကူအညီနဲ့  ဆယ်ယူပြီးပါပြီ။ သွေးစွန်းပေကျံနေတဲ့ တရားခံရဲ့ အ၀တ်အထည်တွေလည်း ချောင်းဦးမြို့နယ် ငါးယှန်ကျေးရွာအနီး က သိမ်းဆည်းရမိခဲ့တယ်။ စစ် ဆေးမှုတွေတော့ ဆက်လက်လုပ် ဆောင်နေပါတယ်။ ဒီနေ့ (နိုဝင် ဘာ ၃ ရက်) လူသတ်မှုနဲ့ ပတ်သက်တဲ့ ပစ္စည်းတွေကို မန္တလေးမှာ လိုက်သိမ်းရမှာပါ’’ ဟု မုံရွာမြို့ နယ်မြေရဲစခန်းမှူး ရဲအုပ်ရဲအောင် က ပြောသည်။

ကံသာဦးရပ်ကွက်တွင် အိမ် ငှားနေသော ဇနီးမောင်နှံနှစ်ဦး သည် အောက်တိုဘာ ၂၇ ရက်က ဓားဒဏ်ရာများဖြင့် သေဆုံးနေပြီး နေအိမ်အိပ်ခန်းအတွင်းမှ မူးယစ် ဆေးဝါးသုံးစွဲသည့် ပစ္စည်းအချို့ ကိုလည်း ရဲတပ်ဖွဲ့က စစ်ဆေး တွေ့ရှိခဲ့သည်။

နှစ်လောင်းပြိုင် လူသတ်မှု ဖြစ်ပွားခဲ့သည့် နေအိမ်အတွင်း ကျန်ရှိခဲ့သော ပစ္စည်းများကို နှစ် ဖက်မိဘများထံ လွှဲပြောင်းရန်နှင့် မှုခင်းသဲလွန်စအထောက်အထား များ ရရှိရေးအတွက် အောက်တို ဘာ ၂၉ ရက် နံနက်က ရဲတပ်ဖွဲ့ ၀င်များက ရှာဖွေစစ်ဆေးခဲ့ရာမှ မူးယစ်ဆေးဝါးများ သိမ်းဆည်းရ မိခဲ့သည်။

7Day Daily
http://www.7daydaily.com/

ရသေ့တောင်မြို့နယ်နှင့် မောင်တောမြို့နယ်တို့မှ မသင်္ကာဖွယ်တွေ့ရှိသူအချို့အား ဖမ်းဆီးရမိ

နေပြည်တော် နိုဝင်ဘာ ၃

ရခိုင်ပြည်နယ် ဘူးသီးတောင်၊ မောင်တော နယ်မြေများအတွင်းသို့ အကြမ်းဖက် စီးနင်းတိုက်ခိုက်သူများ ထပ်မံဝင်ရောက် မှုမရှိစေရေးအတွက် တပ်မတော် စစ်ကြောင်းများ၊ တပ်မတော်(ရေ) အထူး တပ်ဖွဲ့များနှင့် နယ်ခြားစောင့်ရဲတပ်ဖွဲ့ များက နယ်မြေလုံခြုံရေးလုပ်ငန်းများ ဆောင်ရွက်စဉ် နိုဝင်ဘာ ၂ ရက် ည ၇ နာရီ မိနစ် ၅ဝ က ရသေ့တောင်မြို့နယ် ဒုံပိုက်ကျေးရွာ၏ အနောက်ဘက် လေးမိုင်ခန့်အကွာရှိ ပုဒ်မ -၁၄၄ ထုတ်ပြန် ထားသည့်ဧရိယာအတွင်း၌ မောင်တင်ရွှေ အမည်ရှိ မသင်္ကာဖွယ် ငါးဖမ်းစက်လှေ တစ်စင်းအား တွေ့ရှိခဲ့သည်။

အဆိုပါ ငါးဖမ်းစက်လှေအား သွားရောက်စစ်ဆေးရာ စက်လှေပေါ် တွင် လိုက်ပါလာသော ဇာဖောက်ရာမောက် (ဘ) မော်စတာကာမာရ်၊ မော်ဂူလ်(ဘ) အာလီအာမောက်၊ ဟာဖိတ်ဟူဆောင်း (ဘ)အဒူခေါ်ရိမ်၊ မာမတ်ဟူဆောင်(ဘ) အလီဟူဆောင်၊ မာမတ်အီနိုစ်(ဘ) ဟာမာမတ်အမိန်၊ မာမောက်ရော်ဖိတ် (ဘ) အဒူဂေါ်နီ၊ မာမောက်ရော်ဖိတ်(ဘ) နုရ်ဟာနှင့် မာမောက်ရော်ဟိမ်(ဘ) နူရ်မာမောက်တို့ကို ဖမ်းဆီးရမိခဲ့ သည်။
အဆိုပါဖမ်းဆီးရမိသူများအား တရား ဥပဒေအရ အရေးယူနိုင်ရေး အင်းဒင် နယ်မြေရဲစခန်းသို့ စနစ်တကျလွှဲပြောင်း အပ်နှံပြီးဖြစ်ကြောင်း သိရသည်။

အလားတူ ယနေ့နံနက် ၈ နာရီခွဲခန့် တွင် မောင်တောမြို့နယ် ပြောင်ပိုက် ကျေးရွာ၏ အရှေ့ဘက်တစ်မိုင်ခန့် အကွာ တောအတွင်း၌ နိုရူဆောင်း(ဘ) ဟူဆောင်း၊ အီလီယာစ်(ဘ) အဘူဆော် တီ၊ နိုဂူဘရှော့(ဘ) ရှော့မူလူနှင့် ခါမာန် ဟူဆိန်(ဘ) မာမွတ်ဆာလောင်တို့ကို မသင်္ကာဖွယ်တွေ့ရှိရသဖြင့် ဖမ်းဆီးခဲ့ သည်။
ဖမ်းဆီးရမိသူများအား ကြိမ်ချောင်း နယ်မြေရဲစခန်းသို့ စနစ်တကျလွှဲပြောင်းအပ်နှံခဲ့ကြောင်း သတင်းရရှိသည်။

(မြဝတီ)
Myanmaalinn
https://www.facebook.com/MYANMAALINNNEWS/

နေအိမ် အနုကြမ်းစီးသူ နှစ်ဦး၏ ရုပ်ပုံကြမ်း ဖြန့်ဝေ

ဓာတ်ပုံ - MMA

ရန်ကုန်၊ နိုဝင်ဘာ ၄

သင်္ဃန်းကျွန်းမြို့နယ် လေးထောင့်ကန်ရပ်ကွက် ပြည်တော်အေးလမ်းတွင် နေ့ခင်းကြောင်တောင်အချိန် နေအိမ်ထဲ ဝင်ရောက်ပြီး အိမ်ရှင်အမျိုးသမီးကို ချွှန်ထက်သော အရာဖြင့် ထောက်၍ လက်ဝတ်ရွှေထည်ပစ္စည်းများ လုယက်ခဲ့သည့် အမည်မသိ အမျိုးသားနှစ်ဦး၏ ခဲပန်းချီ ပုံကြမ်းများကို မြို့နယ်အနှံ့ရှိ ရဲစခန်းများထံ ဖြန့်ဝေထားသည်။

အဆိုပါ ခဲပန်းချီ ပုံကြမ်းဖြန့်ဝေထားသည့် အမည်မသိ အမျိုးသားနှစ်ဦးမှာ အောက်တိုဘာလ ၃၁ ရက် မွန်းလွဲ ၁ နာရီ ၄၅ မိနစ်က ပြည်တော်အေးလမ်းရှိ နေအိမ်တစ်လုံးမှ အသက် ၅၅ နှစ်အရွယ် အိမ်ရှင်အမျိုးသမီးကို ချွှန်ထက်သော အရာဖြင့်ထောက်၍ သတ်ပစ်မည်ဟု ခြိမ်းခြောက်ပြီး ရွှေထည်ပစ္စည်းများ လုယက်ခဲ့ကြောင်း သင်္ဃန်းကျွန်းမြို့နယ် ရဲတပ်ဖွဲ့မှ ရဲအရာရှိတစ်ဦးက ပြောသည်။

“အစ်မရေလို့ ခေါ်သံကြားမိတာကြောင့် ကျွန်မက နောက်ဖေးခန်းထဲက ထွက်လာတော့ လူစိမ်းအမျိုးသား နှစ်ယောက်က အိမ်ထဲရောက်နေပြီ။ အရပ်ရှည်ရှည်နဲ့လူက ကျွန်မဗိုက်ကို ချွှန်တဲ့အရာတစ်ခုခုနဲ့ လှမ်းထောက်ပြီး မအော်နဲ့ ပြောတယ်။ နောက်ဖေးကို ဆွဲခေါ်သွားပြီး ဝတ်ထားတဲ့ နားကပ်နဲ့ လက်ကောက်နှစ်ကွင်းကို ဆွဲဖြုတ်ယူတယ်။ အရပ်ပုပုနဲ့ ဦးထုပ်ဆောင်းထားတဲ့သူက အိမ်ထဲ ပတ်မွှေပြီး ဘီရိုထဲက ပိုက်ဆံအိတ်ထဲ ထည့်ထားတဲ့ ရွှေဆွဲကြိုးကို ယူသွားတယ်။ မအော်နဲ့ အော်ရင် သတ်ပစ်မယ်ပြောပြီး သူတို့ပြန်ထွက်သွားတယ်” ဟု အနုကြမ်း စီးခံရသည့် အိမ်ရှင်အမျိုးသမီးက ပြောကြားသည်။

အနုကြမ်းစီး လုယက်ခံရသည့် နေအိမ်ဘေးတွင် လက်ဖက်ရည်ဆိုင် ရှိပြီး နေ့ခင်းဘက် လူအများစည်ကားစွာ သွားလာချိန် လူစိမ်းနှစ်ဦး နေအိမ်ထဲ ဝင်ရောက်လုယက်ခဲ့သောကြောင့် ရပ်ကွက်နေသူများမှာ ထိတ်လန့်ကြောက်ရွံ့ခဲ့ပြီး ၎င်းတို့၏ နေအိမ်တံခါးများကို သော့ခတ်ထားရကြောင်း ပြည်တော်အေးလမ်းတွင် နေထိုင်သူများထံမှ သိရသည်။

လုယက်ခံရသော အိမ်ရှင်အမျိုးသမီး၏ ထွက်ဆိုချက်အရ ပြစ်မှုကျူးလွန်သူ အမည်မသိ အမျိုးသားနှစ်ဦး၏ မျက်နှာကို ခဲပန်းချီ ပုံကြမ်းဖော်ခဲ့ပြီး မြို့နယ်အနှံ့ရှိ ခိုးဆိုးလုနှိုက် ပြစ်ချက်ဟောင်းရှိသူများမှ မသင်္ကာသူများကို ခေါ်စစ်ဆေးနေကြောင်း အရှေ့ပိုင်းခရိုင် ရဲတပ်ဖွဲ့ထံမှ သိရသည်။


The Voice
http://thevoicemyanmar.com/

မြန်မာ့ရေပိုင်နက်အတွင်း ဘင်္ဂလားဒေ့ရ်ှနိုင်ငံသားသုံးဦးကို ဖမ်းဆီးရမိ

မြန်မာ့ရေပိုင်နက်အတွင်း ဝင်ရောက်ငါးဖမ်းသည့် မသင်္ကာဖွယ်လှေတစ်စင်း တွေ့ရှိစစ်ဆေးရာ ဘင်္ဂလားဒေ့ရ်ှနိုင်ငံသားသုံးဦးကို ဖမ်းဆီးရမိ

နေပြည်တော် နိုဝင်ဘာ ၃

ရခိုင်ပြည်နယ် မောင်တောမြို့နယ် အတွင်း တပ်မတော်(ရေ)မှ နယ်မြေ လုံခြုံရေးဆောင်ရွက်စဉ် နိုဝင်ဘာ ၂ ရက် ညနေ ၆ နာရီ ၄၅ မိနစ်ခန့်တွင် မင်္ဂလာကြီးချောင်းနှင့် ပြင်ဖြူချောင်း အကြား၌ မသင်္ကာဖွယ်လှေတစ်စင်း တွေ့ရှိသဖြင့် စစ်ဆေးခဲ့သည်။ ထိုသို့ စစ်ဆေးရာ မိမိနိုင်ငံ ရေပိုင်နက်အတွင်း သို့ တရားမဝင် ဝင်ရောက်ငါးဖမ်းနေသည့် ဘင်္ဂလားဒေ့ရ်ှနိုင်ငံသား ဟာမစ်(ဘ) ဂေါ်ဘီယာမွတ်၊ အစ္စမိုင်(ဘ)အီစလမ်နှင့် နိုဘိုဆောင်း(ဘ) မာမတ်စီးတီးတို့ကို ဖမ်းဆီးရမိခဲ့သည်။

အဆိုပါ ဖမ်းဆီးရမိသူများအား တရားဥပဒေအရ အရေးယူဆောင်ရွက်နိုင်ရေး မောင်တောမြို့မရဲစခန်းသို့ စနစ်တကျ လွှဲပြောင်းအပ်နှံခဲ့ကြောင်း သတင်းရရှိသည်။

(မြဝတီ)
Myanmaalinn
https://www.facebook.com/MYANMAALINNNEWS/

ငါးပိ၊ အာဆင်းနစ်၊ ယူရီးယားနဲ့ကျန်းမာရေး အန္တရာယ်

 မကြာသေးခင်က ရန်ကုန်မြို့ရဲ့ ဈေးတစ်ခုအတွင်း သားငါး
ရောင်းတဲ့နေရာကို ရောက်သွားချိန်မှာ အံ့သြစရာ အခြေအနေ တစ်ခုကို တွေ့ခဲ့ရပါတယ်။

ဟင်းသီးဟင်းရွက်တန်းမှာတော့ ယင်ကောင်တွေ တဝီဝီ ပျံသန်းနေပေမယ့် ငါးပိဆိုင်တွေမှာတော့ ယင်ကောင် တစ်ကောင်မှမရှိသလို၊ ငါးပိပုံထဲမှာလည်းလောက်ကောင်လေးတွေကို မတွေ့ရပါဘူး။ ငါးပိနဲ့လောက် ရွှေနဲ့ကျောက်လို့ ဆိုကြပေမဲ့ ငါးပိဆိုင်တွေရဲ့ အနေအထားက အဲဒီဆိုရိုးစကားနဲ့ ဆန့်ကျင်ဘက်ဖြစ်နေပါတယ်။

မြန်မာတွေရဲ့ ရိုးရာအစားအစာ ငါးပိမှာ ဆိုးဆေး၊ ယင်မနားဆေး၊ လောက်သေဆေး၊ ပိုးသတ်ဆေးတွေပါဝင်နေတယ် ဆိုတဲ့ သတင်းတွေ ထွက်နေတာ နှစ်နဲ့ချီ ရှိခဲ့ပေမယ့်လည်း ငါးပိနဲ့ ပတ်သက်တဲ့ သုတေသနတွေ ထွက်ပေါ်လာခြင်းမရှိသေးသလို စားသုံးသူဘေး
အန္တရာယ်ကင်းရှင်းရေးဆိုတာ လေထဲ တိုက်အိမ်ဆောက်သလို မှုန်ဝါးဝါးဖြစ်နေဆဲပါ။

ကင်ဆာနဲ့ ရောဂါစုံဖြစ်ပွားနေခြင်းဟာ လူသုံးများတဲ့ ငါးပိထဲ ပိုးသတ်ဆေး၊ ဓာတုဆေးပါဝင်မှုနဲ့ ဆက်စပ်နေပြီး ဒီပြဿနာကို ပူးပေါင်းဖြေရှင်းဖို့ လိုအပ်နေချိန်မှာ အစားအစာတွေ ဘေးကင်းလုံခြုံအောင် အစိုးရက ယခုထက်ပိုပြီး ထိထိရောက်ရောက် မလုပ်ဘူးလားလို့
မေးခွန်းထုတ်စရာ ဖြစ်နေပါတယ်။

ငါးပိထဲက အာဆင်းနစ်ရန်ကုန်မှာ အစားအစာသုတေသီတချို့ရဲ့
အကူအညီနဲ့ ဈေးကွက်ထဲက ငါးပိနမူနာတချို့ယူပြီး အစိုးရအသိအမှတ်ပြုဓာတ်ခွဲခန်း ၁ဝ ခု လောက်ကိုမကြာသေးခင်က သွားရောက်ဆက်သွယ်ရာမှာ ဓာတ်ခွဲခန်း၎ခုကသာ ငါးပိကို လက်ခံစစ်ဆေးနို်င်တာ တွေ့ရပါတယ်။ အဲဒီထဲမှာပဲဓာတ်ခွဲခန်း၂ခုက အာဟာရတန်ဖိုးတွေကိုသာစစ်ဆေးပေးနိုင်တာပါ။

ဓာတ်ခွဲခန်း တစ်ခုရဲ့ အဖြေကတော့ မျှင်ငါးပိနမူနာမှာ အာဆင်းနစ် ပါဝင်မှု မရှိပါဘူး။ တခြား ဓာတ်ခွဲခန်းတစ်ခုရဲ့ တွေ့ရှိချက်ကတော့ အာဆင်း
နစ်ဓာတ်ပါဝင်မှုကကမ္ဘာ့ကျန်းမာရေးအဖွဲ့သတ်မှတ်ချက်ထက် ၅ ဆနီးပါး ပိုနေပါတယ်။ ဓာတ်ခွဲခန်းမှူးကတော့ အာဆင်းနစ်ဓာတ်ပါဝင်မှုဟာ ဓာတုဆိုးဆေးကြောင့်လို့ပုံသေ ပြောလို့မရဘူး၊ဧရာဝတီတိုင်းဒေသကြီး
ကထွက်တဲ့ ငါးပိတွေမှာဆို ရေကတစ်ဆင့်ပါဝင်နိုင်တယ်လို့သုံးသပ်ပါတယ်။
အစားအသောက် ဆိုင်ရာ ပညာရှင် ဒေါက်တာစိုးခိုင်ကလည်း
ဒေသတချို့ရဲ့ မြစ်ချောင်း၊ အင်းအိုင်များက ရရှိတဲ့ ငါးပုစွန်တွေမှာ အာဆင်းနစ်က သဘာဝ အလျောက် ပါဝင်နိုင်သလို၊ ငါးပိထုတ်လုပ်ပုံ အဆင့်ဆင့်မှာလည်း ပါဝင်လာနိုင်ခြေရှိတယ်လို့ ရှင်းပြပါတယ်။

အာဆင်းနစ်အဆိပ်သင့်ရောဂါလက္ခဏာတွေထဲ ခေါင်းကိုက်ခြင်း၊ ဝမ်းပျက်ဝမ်းလျှောခြင်းတို့ ပါဝင်ကြောင်း သိရပါတယ်။
မြန်မာနိုင်ငံမှာအသည်းကင်ဆာကကင်ဆာရောဂါအားလုံးရဲ့ တတိယ အဖြစ်အများဆုံးအဆင့်မှာရှိနေကြောင်း ရန်ကုန်၊ လမ်းမတော် မြို့နယ် ခုတင် ၅ဝဝဆံ့ ဆေးရုံကြီးရဲ့မှတ်တမ်းများအရသိရပါတယ်။

အဲဒီ ဆေးရုံမှာ အသည်းနဲ့ပတ်သက်ပြီးကုသမှု ခံယူနေတဲ့ လူနာများစွာထဲမှာ တစ်ဦးက ၅၆ နှစ် အရွယ် ဒေါ်ခင်ခင်စော ဖြစ်ပါတယ်။
“ရုတ်တရက် ခေါင်းမူးပြီးကြွက်တက်လို့ ရန်ကုန်ဆေးရုံကြီး အရေးပေါ်ကိုရောက်မှပဲကျွန်မမှာဆီးချို၊ သွေးတိုးသာမကဘဲ အသည်းကိုပါ ထိနေတယ်ဆိုတာသိရတာ” လို့ ဒေါ်ခင်စောကဆိုပါတယ်။

“နေ့တိုင်းစားနေတဲ့ ငါးပိမှာဆိုးဆေးတွေ၊ယူရီးယားတွေ ထည့်တယ်လို့ အပြင်မှာပြောကြတာပဲ။ငါးပိရည်မပါရင် ထမင်းစားမမြိန်လို့စားနေတာပဲ။ အခုတောင် သွေးတိုးရောဂါရှိတယ်လို့ ဆရာဝန်ပြောလို့လျှော့စားနေရတယ်”
သွေးတိုး၊ နှလုံးသွေးကြောကျဉ်း၊ကင်ဆာအပါအဝင် မကူးစက်နိုင်တဲ့
ရောဂါတွေကြောင့် သေဆုံးမှုနှုန်းကမြင့်မားလာတယ်လို့ ပြည်သူ့ကျန်းမာရေးဦးစီးဌာန၊ မကူးစက်နိုင်သည့်ရောဂါများကာကွယ်နှိမ်နင်းရေး ဌာနခွဲညွှန်ကြားရေးမှူး ဒေါက်တာမြင့်ရွှေက ပြောပါတယ်။တခြားရောဂါတွေကြောင့် သေဆုံးသူရာခိုင်နှုန်းထက် ထက်ဝက်ကျော်ရှိနေတယ်လို့ သူက ဆိုပါတယ်။

အာဆင်းနစ်အဆိပ်သင့်အစားအစာတွေကြောင့်အသည်း၊ ကျောက်ကပ် ပျက်စီးစေတယ်၊ ရောဂါလက္ခဏာ ပေါ်လာဖို့လည်း ၅ နှစ်မှ ၁၅ နှစ်အတွင်း ကြာတတ်တယ်လို့ ဆေးပညာရှင်တွေက ဆိုပါတယ်။
အာဆင်းနစ် ပါဝင်တဲ့ရေကို သောက်သုံးရတဲ့ ဒေသက ဒေသခံတွေ အနေနဲ့ ဆီးအိမ်၊ အဆုတ်၊ အရေပြားကင်ဆာတို့ ဖြစ်စေနိုင်ပြီး
အရေပြားပြဿနာများ၊ သွေးလည်ပတ်မှုစနစ်၊ ပင်ကို ခုခံအားစနစ် နဲ့ အာရုံကြော စနစ်တွေကို ပျက်စီး ထိခိုက်စေနိုင်တယ်လို့ကမ္ဘာ့ကျန်းမာရေးအဖွဲ့
စစ်တမ်းက ဖော်ပြထားပါတယ်။

(ငါးပိ ဈေးကွက်)

မြန်မာပြည်သား အများအပြား နှစ်သက်ကြတဲ့ ငါးပိကိုဧရာဝတီတိုင်း ဒေသကြီး
မှာစီးပွားဖြစ် ထုတ်လုပ်လျက်ရှိပြီးနိုင်ငံအနှံ့ ဖြန့်ချိနေပါတယ်။
ဈေးနှုန်းအနည်းငယ် မြင့်မားတဲ့မြိတ်၊ထားဝယ်ဒေသနဲ့ ရခိုင်ပြည်နယ်ထွက်
ငါးပိက ဒေသတွင်းစားသုံးမှုများပြီး တစ်ခြားဒေသကိုတင်ပို့မှု နည်းပါတယ်။

နှစ်စဉ်ငါးပိနဲ့ ငန်ပြာရည်တန်ချိန်၃,၁ဝဝ၊ ငါးခြောက်တန်ချိန်၅၃,ဝဝဝ
လောက်ကိုအလုပ်သမားအင်အား၆,ဝဝဝဝန်းကျင်နဲ့ ထုတ်လုပ်နေကြောင်း ငါလုပ်ငန်း ဦးစီးဌာနရဲ့ခန့်မှန်းစာရင်းတွေမှာ တွေ့ရပါတယ်။
ရန်ကုန်၊ ဒဂုံဆိပ်ကမ်းမြို့နယ် ငါးပိ၊ ငါးခြောက်ဇုန်မှာအလုပ်ရုံ၎ဝဝဝန်းကျင်
ဟာ မြေအောက်ရေကိုသာသုံးစွဲကြပြီး ရေသန့်စက်တွေ တပ်ဆင်သုံးစွဲဖို့
တွက်ခြေ မကိုက်နိုင်ဘူးလုိ့ လုပ်ငန်းရှင်တွေဆီက သိရပါတယ်။

ငါးပိလုပ်ငန်းလုပ်ကိုင်သူတွေက စည်ပင်သာယာရေးကော်မတီ၊
ငါးလုပ်ငန်းဦးစီးဌာနတို့မှာလုပ်ငန်းလိုင်စင်လျှောက်ဖို့ လိုအပ်ပါတယ်။ ငါးပိလုပ်ငန်းရှင်၂ဝဝ ကျော်က ငါးလုပ်ငန်းဦးစီးဌာနမှာလိုင်စင် တင်ထားတယ်၊ ဒါဟာ နိုင်ငံတစ်ဝန်းလုပ်ငန်းရှင် အရေအတွက်ရဲ့ ၁ဝရာခိုင်နှုန်းကိုသာကိုယ်စားပြုတယ်လို့မြန်မာနိုင်ငံ ငါးပိ၊ငါးခြောက်၊ငန်ပြာရည်ထုတ်လုပ် ရောင်းဝယ်သူများအသင်း အတွင်းရေးမှူး ဦးထွန်းစိန်က ပြောပါတယ်။

(မျှင်ငါးပိနဲ့ ဆိုးဆေး)
ငါးပိဆိုတာ မိသားစု အများစုရဲ့ မီးဖိုခန်းထဲမှာ သ်ိမ်းဆည်း သိုလှောင်ထားတဲ့ အစားအစာ ဖြစ်ပါတယ်။ နိုင်ငံရပ်ခြားကိုရောက်နေတဲ့ မြန်မာတွေ အမြဲတောင့်တမိတဲ့ အစားအစာစာရင်းမှာလည်း ငါးပိရည်၊ ငါးပိထောင်းကထိပ်တန်းမှာနေရာယူထားပါတယ်။
ရန်ကုန်၊ လမ်းမတော်မြို့နယ်နေ ဒေါ်ခင်မေမြင့်က “ဇာတိမြေဖြစ်တဲ့ သံတွဲကပဲ မျှင်ငါးပိကို မှာပြီးတော့ သုံးတာ။ လတ်ဆတ်တဲ့ မျှင်ကောင်တွေကို ထောင်းထားတဲ့အတွက် အနံ့ပိုကောင်းတယ်။
အိမ်ကဟင်းချက်တဲ့အခါ မပါမဖြစ်ဆိုတော့၁ နှစ်စာလောက်ကို ဝယ်လှောင်ထားရတယ်” လို့ ပြောပြပါတယ်။

ငါးပိမှာအာဟာရဓာတ်တွေ၊ ဗီတာမင်တွေအများကြီးပါဝင်တဲ့အတွက် အရိုးအဆစ်သန်မာစေရုံမက ကျန်းမာရေးအတွက်လည်း များစွာ အကျိုးပြုတယ်လို့ ပညာရှင်တွေဆီက သိရပါတယ်။
ကမ်းရိုးတန်းဒေသမှာ ငါးခြောက်လုပ်ဖို့ စံမမီတဲ့ငါးတွေကို ကြိတ်ပြီး ဆားလူး လိုက်ပါတယ်။ အဲဒီနောက် ပုစွန်ဖွဲခွံ ရောထည့်ပြီး ကြိတ်ရပါတယ်။ လုပ်ငန်းရှင်တချို့ကတော့ မကြိတ်ခင်မှာ ဆိုးဆေးကို ရေဖျော်ပြီးဖြန်းတယ်၊ သုံးခေါက်လောက် ကြိတ်လိုက်ရင် အရောင်ညီညာတဲ့ မျှင်ငါးပိကို ရနိုင်တယ်လို့ ပြောပါတယ်။

ဈေးကွက်မှာ မျှင်ငါးပိ ရောင်းပန်းလှဖို့ ဓာတုဆေး အသုံးပြုလာတာနှစ်ပေါင်း ၄ဝဝန်းကျင် ကြာခဲ့ပြီလို့ သိရပါတယ်။ အစားအသောက်နဲ့
ဆေးဝါးကွပ်ကဲရေးဦးစီးဌာန (FDA)က တားမြစ်တာတွေ ရှိပေမယ့် ငါးပိ ထုတ်လုပ်သူတချို့က တားမြစ်ဆိုးဆေးတွေရဲ့ အန္တရာယ်ကို သိပုံမရကြပါဘူး။ စားသုံးသူတချို့ကလည်း မျှင်ငါးပိ ဆိုတာ အနီရောင်လို့ ထင်မှတ်နေတာတွေလည်း ရှိပါတယ်။
မျှင်ငါးပိ အရောင်နီနေတိုင်းလည်း အရောင်ပါတယ်လို့ ပြောလို့ မရပါဘူး။ ပင်လယ် လေတိုက်တာတွေ ပြောင်းလဲတဲ့အခါ သဘာဝအရောင်ပါတဲ့ မျှင်ငါးပိကို ရရှိနိုင်ပါသေးတယ်။

အရောင်ထည့်ရခြင်းရဲ့ အားသာချက်ထဲမှာ အရသာ ခါးသက်မသွားခြင်း၊ တာရှည်အထားခံခြင်းတို့ ပါဝင်ကြောင်း ငါးပိလုပ်ငန်းရှင် တစ်ဦးက ပြောပြပါတယ်။
ရန်ကုန်မြို့ကငါးပိလုပ်ငန်းရှင်တစ်ဦးဖြစ်တဲ့ဦးရွှေမန်းက “လုပ်ငန်းရှင်တွေ အနေနဲ့ အမြဲတမ်း ဓာတ်ခွဲခန်းကိုသွားပြီး စမ်းသပ်နေဖို့ မဖြစ်နိုင်ပါဘူး၊ ငါးပိထွက်တဲ့အချိန်ကျရင် တစ်ရက်ကို ငါးပိကုန်သည် အယောက် ၆ဝကနေ ၈ဝ အထိ ဘုရင့်နောင် ပွဲရုံကို တင်ပို့နေတာတွေ ရှိပါတယ်” လို့ ပြောပါတယ်။
တားမြစ်ဆိုးဆေး နဲ့ကင်ဆာစားသောက်ကုန်တွေအရောင်အဆင်း လှ၊
အရသာ ကောင်း၊ တာရှည်ခံဖို့အတွက်ဓာတုဆေး သုံးစွဲတာပိုမို များပြားလာကြောင်း ဈေးကွက်ထဲ စုံစမ်းမှု အရ သိရပါတယ်။

အစားအစာထဲ အများဆုံးတွေ့ရှိရတဲ့ ဓာတုဆိုးဆေးမှာအထည်ချုပ်လုပ်ငန်းသုံး Rhodamine B ဖြစ်ကြောင်း၊ အစာအိမ်အူလမ်းကြောင်းရောင်ရမ်းခြင်း၊ ပျို့အန်ခြင်း၊ ဦးနှောက်အာရုံကြော ထိုင်းမှိုင်းခြင်းတို့ လတ်တလောဖြစ်ပေါ်စေကြောင်း သိရပါတယ်။
ရေရှည်မှာတော့ခန္ဓာကိုယ်ကြီးထွားမှုထိခိုက်စေခြင်း၊ အသည်း၊
ကျောက်ကပ်တို့ ပျက်စီးခြင်းနဲ့ကင်ဆာရောဂါတွေ ဖြစ်ပေါ်စေနိုင်ကြောင်း FDA က ထုတ်ပြန်ထားပါတယ်။

စက်တင်ဘာလကျန်းမာရေး ဝန်ကြီးဌာနရဲ့ ထုတ်ပြန်ချက်တစ်ခုမှာ ဒီဆိုးဆေးအပါအဝင် Auramine O, Sudan Dyes, Orange II တို့ဟာ မြန်မာပြည် အစားအသောက်လုပ်ငန်းအတွင်း အများဆုံး သုံးနေကြတဲ့ အန္တရာယ်ရှိ တားမြစ်ဆိုးဆေးများ ဖြစ်ကြောင်း
ဖော်ပြထားပါတယ်။

ဓာတ်ခွဲခန်းမှူး တစ်ဦးကတော့ သူတို့ဆီမှာ RhodamineB မှတစ်ပါး တခြားတားမြစ်ဆိုးဆေးတွေကို ရှာဖွေ စမ်းသပ်နိုင်တဲ့ နည်းပညာတွေ မရှိသေးဘူးလို့ ပြောပြပါတယ်။

မြန်မာနိုင်ငံမှာ ဖြစ်ပွားနေတဲ့ကင်ဆာရောဂါတွေရဲ့ ၉ဝ ရာခိုင်နှုန်းဟာ အစားအသောက်က မြစ်ဖျားခံတယ်လို့ မီဒီယာတချို့မှာ ဖော်ပြနေကြတာ ကြာပါပြီ။

၂ဝဝ၈ ခုနှစ်ကကျန်းမာရေး ဝန်ကြီးဌာနက ဈေးကွက်အတွင်း မျှင်ငါးပိမှာ တားမြစ်ဆိုးဆေးပါရင် သိမ်းယူပြီး ဖျက်ဆီးခဲ့ပါတယ်။
အစားအသောက်မှာတားမြစ်ဓာတုဆေးလုံးဝအသုံးမပြုဖို့လုပ်ငန်းရှင်တွေကို သတိပေးထားပြီး လိုက်နာမှုမရှိပါက အမျိုးသား အစားအသောက် ဥပဒေ အရ အရေးယူမယ်လို့လည်း သက်ဆိုင်ရာက ထုတ်ပြန်ထားပါတယ်။

၂ဝ၁၄ ခုနှစ်က ဧရာဝတီတိုင်း ဒေသကြီးမှာ FDA ရုံးခွဲတစ်ခုကို တိုးချဲ့ခဲ့ပြီး ဈေးကွက်ထဲ စစ်ဆေးရာမှာ မျှင်ငါးပိ ၇ဝရာခိုင်နူန်းလောက်မှာ တားမြစ်ဆိုးဆေး ပါဝင်တာ တွေ့ရှိခဲ့ရတယ်လို့တိုင်းဒေသကြီး အစားအသောက်နှင့် ဆေးဝါးကွပ်ကဲရေး ဦးစီးဌာန ဒု ညွှန်ကြားရေးမှူး ဒေါက်တာပြည့်ဖြိုးက ပြောပါတယ်။

ဧပြီကနေ စက်တင်ဘာအတွင်း ဧရာဝတီတိုင်း ဒေသကြီး
ကျေးရွာမြို့နယ်တွေက ရရှိတဲ့ မျှင်ငါးပိ နမူနာတွေကို ဓာတ်ခွဲခန်းပို့ စစ်ဆေးထားတယ်၊ တားမြစ်ဆိုးဆေး တွေ့ရှိရင် မူလထုတ်လုပ်တဲ့ နေရာအထိ ရှာဖွေ အရေးယူသွားမယ်လို့လည်း သူက ဆက်ပြောပါတယ်။

“ငါးပိထုတ်လုပ်တဲ့ နေရာတွေမှာ ဆိုးဆေးအသုံးပြုထားတဲ့ လက်ရာတွေ ရှိနေတုန်းပါပဲ။ သူတို့ ပြောတာကအရင်တုန်းက
လက်ကျန်တွေပါလို့တော့ပြောတယ်” လို့ ဒေါက်တာပြည့်ဖြိုးကဆိုပါတယ်။

ဇူလိုင်လကလည်း မန္တလေးတိုင်း ဒေသကြီးအတွင်းဈေး ၁၃ ခုက ရရှိတဲ့ ငါးပိ နမူနာတွေရဲ့ ၁၉ ရာခိုင်နှုန်းမှာတားမြစ်ဆိုးဆေး
တွေ့ရှိရကြောင်းFDAကထုတ်ပြန်ခဲ့ပါသေးတယ်။

သဘာဝဆိုးဆေးတွေ ရှိပေမဲ့ ကုန်ကျစရိတ် ကြီးမားခြင်း၊ တာရှည်မခံခြင်း၊ ရောင်းပန်းမလှခြင်း၊ ဝယ်ယူရရှိဖို့ ခက်ခဲခြင်းတို့ကြောင့် လုပ်ငန်းရှင်တွေက အသုံးပြုမှု နည်းပါးတယ်လို့ ဆိုပါတယ်။

(ယင်မနားဆေးနဲ့ ပိုးသတ်ဆေး )
ငါးပိ ရောင်းတဲ့ဈေးတွေမှာရောင်းချသူတွေဟာမိရိုးဖလာနည်းတွေအရဆိုလို့ရှိရင် တစ်နေ့စာကိုပဲ ပုံပြီးရောင်းတာပါ။ လုပ်ငန်းရှင် ဦးရွှေမန်းက “ဆားကို အသုံးပြုပြီး ထိန်းရင်လည်းရပါတယ်။ နည်းပညာကိုတော့ လုပ်သက်ရင့်တဲ့ လူတွေဆီကသင်ယူရတာတွေလည်း ရှိပါတယ်” လို့ ဆိုပါတယ်။
ငါးပိ ငါးခြောက်တွေမှာ ယင်မနားဆေး အသုံးပြုနေကြတာလည်း
ကာလအတော်ကြာနေပြီ ဖြစ်ကြောင်း၊ လောလောဆယ်မှာ ထိန်းချုပ်လို့ရတဲ့ အနေအထားကိုတော့ ရောက်နေပြီ ဖြစ်ကြောင်း လက်တွေ့ကွင်းဆင်းပြီး
တွေ့ရတဲ့ အခြေအနေကို ဒေါက်တာပြည့်ဖြိုးက ပြောပြပါတယ်။
ယင်မနားဆေး ထည့်သွင်းထားခြင်း ရှိမရှိကို ငါးလုပ်ငန်းဦးစီးဌာန
နဲ့စိုက်ပျိုးရေး ဦးစီးဌာနမှာရှိတဲ့ ဓာတ်ခွဲခန်းတွေမှာသာ စစ်ဆေးနိုင်တာပါ။

“ဓာတုဗေဒ ဆိုးဆေး၊ ယင်မနားဆေး၊ တာရှည်ခံဆေး မသုံးစွဲဖို့ကျွန်တော်တို့ အသင်းအဖွဲ့ကအသိပညာပေး ဆွေးနွေးပါတယ်၊ဒါပေမယ့် လိုက်နာမှု အားနည်းနေတာတွေ့ရပါတယ်၊ကျွန်တော်တို့ အဖွဲ့က အာဏာပိုင်အဖွဲ့
အစည်းလည်း မဟုတ်တော့ တင်းကျပ်စွာလုပ်ဆောင်လို့မရပါဘူး”
လို့ ငါးပိ၊ငါးခြောက်၊ ငန်ပြာရည် ထုတ်လုပ် ရောင်းဝယ်သူများအသင်း အတွင်းရေးမှူး ဦးထွန်းစိန်က ပြောပါတယ်။

ရန်ကုန်ဈေးကွက်အတွင်း လေ့လာတဲ့အခါ Tricholorofon (ထရိုင်ကလိုရိုဖောင်း)လို့ခေါ်တဲ့ ပိုးသတ်ဆေး တမျိုးကို ငါးပိ ထုတ်လုပ်သူတွေ ဝယ်ယူမှု ရှိနေတယ်လို့ သိရပါတယ်။

အဲဒီ စိုက်ပျိုးရေး လုပ်ငန်းသုံး ဓာတု ဆေးဝါးကို အစားအစာတွေမှာ ထည့်သွင်း အသုံးပြုရင် ငွေဒဏ်ကနေ ထောင် ၅ နှစ် အထိ ချမှတ်နိုင်တဲ့ ပိုးသတ်ဆေး ဥပဒေ ပုဒ်မ(၃၃)အရ အရေးယူခံရနိုင်တယ်လို့ ဧရာဝတီတိုင်း ဒေသကြီး စိုက်ပျိုးရေး ဦးစီးဌာန တိုင်းသီးနှံကာကွယ်ရေး တာဝန်ခံ ဦးဝင်းစိုးက ပြောပါတယ်။

“ပိုးသတ်ဆေး ရောင်းမယ် ဆိုလို့ရှိရင် သုံးစွဲပုံသင်တန်း တက်ရပါတယ်။ သင်တန်း လက်မှတ်ရပြီးမှပဲ ပိုးသတ်ဆေးရောင်းချခွင့် လိုင်စင်
လျှောက်ရတာပါ။ ဒါတွေမရှိဘဲ ရောင်းချရင် ပိုးသတ်ဆေး ဥပဒေနဲ့ အရေးယူပါမယ်” လို့ ဦးဝင်းစိုးက ရှင်းပြပါတယ်။

ထရိုင်ကလိုရိုဖောင်းက အမှုန့်၊ အရည်နဲ့ အခဲ ဆိုပြီး ပုံစံ ၃ မျိုးနဲ့ ဈေးကွက်ထဲမှာ ရှိတာပါ။ အဲဒီထဲမှာ တရုတ်နိုင်ငံကနေ တရားမဝင် တင်သွင်းတဲ့ အစိမ်းရောင်ပုလင်းကို သုံးစွဲမှုများတယ်လို့ ဈေးကွက်ထဲက သိရပါတယ်။

နယ်ဘက်က မှာယူတာတွေကိုလည်းကားဂိတ်ကနေတဆင့် ပို့ပေးတယ်လို့ ရောင်းချသူတွေကပြောပါတယ်။ ရောင်းချသူတွေကလည်း ဓာတုဆေးဝါးတွေနဲ့ ဒီဓာတုဆေးဝါးတွေရဲ့ အန္တရာယ်ကိုနားမလည်တာ တွေ့ရပါတယ်။

ဆေးအမည်ကိုတောင် မှန်ကန်အောင် မပြောနိုင်ဘဲ လောက်သေဆေး၊ ယင်မနားဆေး အစရှိတဲ့ အခေါ်အဝေါ်တွေနဲ့ ရောင်းချ နေကြတာပါ။
ပိုးသတ်ဆေး တာရှည် အသုံးပြုမိရင် ဥာဏ်ရည်၊ မျိုးပွားစွမ်းအင်၊ ရောဂါဘယဒဏ်ခံနိုင်ရည်ရှိမှုတို့ကျဆင်းလာခြင်း၊ ပုံမမှန်မွေးဖွားမှု၊ ကင်ဆာရောဂါတို့ ဖြစ်ပေါ်လာနိုင်စေတယ် လို့ ဒေါက်တာပြည့်ဖြိုးက ပြောပြပါတယ်။

“ဘယ်ပိုးသတ်ဆေးကိုမှ အစားအသောက်မှာ ပါဝင်ဖို့် FDAက ခွင့်ပြုထားတာ မရှိဘူး။ အခုမထည့်ဖို့ ညှိနှိုင်း ထားတယ်၊ နည်းပညာရှာနေတယ်။ ဒီကြားထဲကျုးလွန်ရင် အရေးယူမယ်” လို့ သူက ပြောပါတယ်။
ငါးပိထဲက ဓာတ်မြေသြဇာ
သဘာဝ အလျောက်ရှိတဲ့ ယူရီးယားဆိုတာက နိုက်ထရိုဂျင်ပါဝင်တဲ့ ဓာတုပေါင်းစပ်မှု ဖြစ်ပြီး နို့တိုက်သတ္တဝါ တွေက စွန့်လိုက်တဲ့ ဆီးမှာပါဝင်ပါတယ်။

အစားအသောက်ရေးရာ ပညာရှင် ဒေါက်တာစိုးခိုင်က အသားဓာတ်ကတစ်ဆင့် ဖြစ်ပေါ်လာတဲ့ ယူရစ်အက်ဆစ်ဟာ အဆစ် အမြစ် ရောင်ရမ်းတဲ့ရောဂါကို ဖြစ်စေတယ်လို့ ပြောပြပါတယ်။
“အသည်းရောဂါနဲ့ ကျောက်ကပ်ရောဂါ ရှိသူတွေ အနေနဲ့ ယူရီးယားဓာတ် ပါဝင်မှု မြင့်တဲ့ ကြက်သား၊ ငါး၊ ငါးပိ၊ ငါးပိရည် စတာတွေကို မစားသုံးသင့်ဘူး” လို့လည်း ဒေါက်တာစိုးခိုင်က ပြောပါတယ်။ဒေါက်တာပြည့်ဖြိုးကလည်း
ယူရီးယားနဲ့ ပတ်သက်ပြီးအလားတူ သုံးသပ်ပါတယ်။

“အပူပေး ချက်ပြုတ်လိုက်တဲ့ ယူရီးယားကအငွေ့ပျံသွားတဲ့အတွက် အန္တရာယ်တော့ မရှိလောက်တော့ဘူး။ ဒါပေမယ့် စိတ်ချလက်ချစားသုံးဖို့ မပြောနိုင်သေးပါဘူး။ တိကျတဲ့ သုတေသနရလဒ်တွေလည်းမရှိသေးပါဘူး” လို့ ဒေါက်တာပြည့်ဖြိုးက ပြောပါတယ်။

အရည်ကျိုငါးပိမှာယူရီးယားဓာတ်မြေသြဇာကိုထည့်ခြင်းဖြင့် ထုတ်လုပ်မှုကြာချိန်ကိုလျှော့ချနိုင်တယ်၊ ယူရီးယားကိုမသုံးတဲ့ လုပ်ငန်းရှင်လည်းရှိတယ်လို့ သူက ဆက်ပြောပါတယ်။
ငါးပိလုပ်ငန်းကိုကာလကြာရှည် လုပ်ကိုင်ဖူးသူ ရန်ကုန်၊ မင်္ဂလာဒုံမြို့နယ်က အမျိုးသမီးတစ်ဦးက“တစ်လအတွင်းငါးပိဖြစ်စေဖို့အတွက်မြေဆီ
(ဓာတ်မြေသြဇာ)အဖြူတစ်မျိုးကို ထည့်ပြီး သိပ်ပါတယ်။
အဲဒီမြေဆီအဖြူမှုန့်ကိုလည်းဘုရင့်နောင်ပွဲရုံတန်းကစိုက်ပျိုးရေးဆိုင်တွေကဝယ်ယူရပါတယ်” လို့ ပြောပြပါတယ်။

ဘုရင့်နောင်ပွဲရုံတန်းစိုက်ပျိုးရေးပစ္စည်း အရောင်းဆိုင်တွေကိုကွင်းဆင်းလေ့လာစုံစမ်းတဲ့အခါ ငါးပိကုန်သည်တွေကယူရီးယားကိုအရည်ကျိုငါးပိထုတ်လုပ်ဖို့ ဝယ်ယူတယ်လို့ပြောပေမယ့်အခုလို ပြဿနာတွေ ဖြစ်ပြီးတဲ့နောက်ပိုင်းမှာ ငါးကန်ထဲထည့်ဖို့သာ ပြောဆို ဝယ်ယူမှုတွေ ရှိနေတယ်လို့်သိရပါတယ်။
စိုက်ပျိုးရေးသမားကယူရီးယားအရည်အသွေးကို သေချာစစ်ပြီးမှ ဝယ်ပေမယ့် ငါးကန်သမားတွေကတော့ ဈေးပေါတာကိုသာဝယ်ယူလေ့ ရှိတယ်လို့ အရောင်းဝန်ထမ်းတစ်ဦးက ပြောပြပါတယ်။

ဧရာဝတီတိုင်းဒေသကြီး အတွင်း ငါးပိထုတ်လုပ်မှုတွေကို သုတေသန လုပ်နေသူ ဒေါက်တာပြည့်ဖြိုးကတော့ထုတ်လုပ်ပုံ လုပ်ငန်းစဉ် အဆင့်ဆင့်မှာ သန့်ရှင်းမှု အားနည်းတယ်လို့ ပြောပြပါတယ်။

အိမ်နီးချင်း ထိုင်းနိုင်ငံမှာတော့ ငါးပိစက်ရုံတွေမှာဆိုရင် ခေါင်းစွပ်၊ လက်အိတ်တွေနဲ့ အဝတ်အစား အကာ အကွယ် တွေကို သေချာသပ်ရပ်စွာ ဝတ်ဆင်ပြီးကျန်းမာရေးနဲ့ ညီညွတ်အောင် ထုပ်လုပ်မှု၊သန့်ရှင်းမှုတို့ကြောင့်သူတို့ငါးပိကို နိုင်ငံတကာပို့တဲ့ အဆင့် ဖြစ်နေပါပြီ။

စားသုံးသူကာကွယ်ရေး ရန်ကုန်တိုင်းဒေသကြီး စားသုံးသူရေး
ရာဦးစီးဌာန တိုင်းဦးစီးမှူး ဦးမြင့်ချိုကမမှန်မကန် ထုတ်လုပ်နေတဲ့ လုပ်ငန်းရှင်တွေကို စားသုံးသူကာကွယ်ရေး ဥပဒေအတိုင်း အရေးယူတယ်လို့ ပြောပါတယ်။

“ငါးပိဆိုတာက အမျိုးသားရေး စားကုန်။ ငါးပိငါးခြောက် ထုတ်လုပ်တဲ့ ပုံစံကကျန်းမာရေးနဲ့ မညီညွတ်ဘူး။ငါးပိဆိုတာစထုတ်ကတည်းက
ခြေထောက်နဲ့နင်းပြီး သိပ်တာ” လို့ ဦးမြင့်ချိုက ရှင်းပြပါတယ်။
ဒေါက်တာပြည့်ဖြိုးကတော့ ၂ဝ၁၄ ခုနှစ်က ပြဋ္ဌာန်းခဲ့တဲ့ စားသုံးသူကာကွယ်ရေး ဥပဒေမှာ လိုအပ်ချက်တွေ ရှိနေသေးကြောင်း ထောက်ပြပါတယ်။

“အဟောင်းက လိုအပ်ချက်တွေ သိပ်များနေလို့စနစ်နဲ့ အံမဝင်တော့လို့ အသစ်ရေးဆွဲနေပါတယ်” လို့ ဒေါက်တာပြည့်ဖြိုးက ဆိုပါတယ်။
စားသောက်ကုန်နဲ့ ပတ်သက်တဲ့ မသမာမှုတွေတွေ့ရင် တိတိကျကျ သတင်းပေးတိုင်ကြားပါကလာရောက်စစ်ဆေးအရေးယူပါမယ်လို့လည်းသူက ဆက်ပြောပါတယ်။

အခုချိန်ထိတော့ကျန်းမာရေးဝန်ကြီးဌာန၊စည်ပင်သာယာရေးကော်မတီ၊စားသုံးသူကာကွယ်ရေး အသင်းတွေကို တိုင်ကြားချက်တွေ
ရောက်လာတာနည်းပါးနေသေးတယ်လို့ သိရပါတယ်။
ဓာတုကင်းစင်တဲ့ ငါးပိ၊ငါးခြောက်နဲ့ငန်ပြာရည်လုပ်ငန်းတွေကို
ထောက်ခံစာထုတ်ပေးသွားမယ်လို့ မြန်မာနိုင်ငံငါးလုပ်ငန်းအဖွဲ့ချုပ်ဒု ဥက္ကဋ္ဌ ဦးနှင်းဦးကပြောပါတယ်။ ငါးပိ လုပ်ငန်းရှင် ဦးရွှေမန်းက
နိုင်ငံတကာအဆင့်မီ သန့်သန့်ရှင်းရှင်း ထုတ်လုပ်ဖို့ ကြိုးပမ်းနေသူဟာ နည်းပညာ၊ ငွေကြေး အကန့်အသတ်တို့နဲ့ ကြုံနေရတယ်လို့ ပြောပါတယ်။

“ထိုင်းနိုင်ငံအထိ နည်းပညာတွေကိုသွားရောက် လေ့လာခဲ့ပေမယ့်
တစ်ချို့စက်ရုံတွေက ဝင်ရောက် လေ့လာခွင့်တောင် မပေးပါဘူး။
ထုတ်လုပ်မှု အဆင့်ဆင့်တွေကို လက်နဲ့လုပ်တာထက် စက်နဲ့လုပ်တဲ့ စနစ်ကို ရောက်စေချင်နေပြီ။ နိုင်ငံတော် အဆင့်ကူညီပံ့ပိုးမှုတွေနဲ့ အဆင့်မီနည်းပညာတွေ ပံ့ပိုးပေးစေချင်ပါတယ်” လို့ ဦးရွှေမန်းကပြောပါတယ်။

ငါးပိ၊ငန်ပြာရည်ကို နိုင်ငံတကာ လက်ခံဖို့အတွက်ဆိုရင်နည်းပညာမှန်ကန်စွာ၊
သန့်ရှင်းစွာ ထုတ်လုပ်ရမှာပါ။ အကောင်းဆုံးကိုဘယ်လိုထုတ်လုပ်ကြမလဲဆို
တာအားလုံး ပူးပေါင်းပါဝင်ပြီး အဖြေရှာကြဖို့ လိုအပ်ပါတယ်။
အဲဒီလိုမျိုးမလုပ်နိုင်ရင်တော့ နိုင်ငံတကာကိုလည်း မထိုးဖောက်နိုင်တဲ့အပြင်
ပြည်တွင်းမှာလည်း အများပြည်သူအတွက်ကျန်းမာရေး အန္တရာယ်ရှိပြီး ဆုံးရှုံးနစ်နာမှုတွေ ဆက်လက် ကြုံတွေ့နေကြရဦးမှာ ဖြစ်ပါတယ်။။

(အလွတ်တန်းသတင်းထောက် စိုးစံထိုက်က ငါးပိလုပ်ငန်းနှင့်ဈေးကွက်အတွင်းကိုယ်တိုင်ကွင်းဆင်းပြီး စုံစမ်းဖော်ထုတ် ရေးသားထားခြင်း ဖြစ်ပါသည်။)

News Watch ( စောင့်ကြည့်သတင်းဂျာနယ် )
https://www.facebook.com/NewsWatchJournal/

တောင်ဒဂုံသစ်ဆိပ်အနီး ကွေ့မချောင်းရိုး၌ မိချောင်းတစ်ကောင် ဖမ်းဆီးရမိ

ရန်ကုန် နိုဝင်ဘာ ၃

တောင်ဒဂုံသစ်ဆိပ်ရှိ သစ်လုံးများအဝင်အထွက်မှတ်သော ဖြတ်ပိုင်းရုံး အနီး ကွေ့မချောင်းအတွင်း အရှည်ရှစ်ပေခွဲရှိသော မိချောင်း တစ်ကောင်အား နိုဝင်ဘာ ၃ ရက် နံနက်ပိုင်းက ဖမ်းဆီးရမိကြောင်း သိရသည်။

၎င်းကွေ့မချောင်းသည် ငမိုးရိပ်ချောင်းအတွင်းစီးဝင်သော ချောင်း လက်တက်တစ်ခုဖြစ်ပြီး မြစ်ရေတက်သောအခါချောင်းရေပြည့်ပြီး မြစ်ရေကျသွားလျှင် ချောင်းရိုးငယ်တစ်ခုအဖြစ်သာရှိသော ချောင်းတစ်ခုဖြစ်သည်။

မိချောင်း၏ ခြေသည်းလက်သည်းများမှာ ဖြတ်တောက်ထားသောပုံသဏ္ဌာန်ရှိသဖြင့် အနီးအနားမွေးမြူရေး စခန်းမှ ရေတက်သောအချိန် လွတ်ထွက်လာသော မိချောင်းဖြစ်နိုင်ကြောင်း ဒေသခံများက သုံးသပ်ပြောကြားလျက်ရှိသည်။

''ကျွန်တော် ဒီသစ်ဆိပ်မှာတာဝန်ကျနေတာ ဆယ်နှစ်ကျော် ပါပြီ။ တစ်ခါမှမိချောင်းတွေ့တယ်လို့မကြားရသလို မြင်လည်းမမြင် မိပါဘူး။ အခုလိုတွေ့တာ အံ့သြပါတယ်။

သစ်ဆိပ်အနီးနေထိုင်ကြတဲ့ ဒေသခံတွေက ဒီရိုးချောင်းမှာ တစ်သက်လုံး ဖားရှာ ငါးရှာနေလာခဲ့ ကြတာပါ။ ဒီမိချောင်းတွေ့တဲ့သူက ပထမသေးသေးလေးအောက်မေ့ပြီး ကျဉ်စက်နဲ့ မိချောင်းခေါင်းကိုညှပ်ထိုးပြီး ဖမ်းတာ၊ မိချောင်းက ကြီးတော့ ပတ်ဝန်းကျင်အကူအညီတောင်းလို့ သစ်ဆိပ်ဝန်ထမ်းတွေနဲ့ အနီးအနားကလူတွေ ဝိုင်းဖမ်းကြတယ်။

မိချောင်းက ကျဉ်စက် ဒဏ်ကြောင့် အမြီးကခြုံတွေနဲ့ငြိနေလို့ ဝိုင်းတက်ဖိပြီး ဖမ်းခဲ့ရတယ်။ ရေနည်းနေတော့တော်သေးတယ်။ ဘယ်သူမှ အန္တရာယ်မရှိဘူး'' ဟု သစ်ဆိပ်တာဝန်ခံ ဦးဝင်းကိုက ပြောသည်။

၎င်းမိချောင်းအား သက်ဆိုင်ရာသို့အကြောင်းကြားပြီး သာကေတ မိချောင်းမွေးမြူရေးစခန်းသို့ ပို့ဆောင်ထားခဲ့ပြီးဖြစ်ကြောင်း သိရသည်။

ကြေးမုံ

https://www.facebook.com/TheMirrorDaily

အိန္ဒိယ-ပါကစ္စတန် သံတမန်တွေ အပြန်အလှန် မောင်းထုတ်

ပါကစ္စတန်- အိန္ဒိယ အလံ

အိန္ဒိယနိုင်ငံမှာ တာဝန်ထမ်းဆောင်နေတဲ့ ပါကစ္စတန် သံတမန် ၆ ဦးကို သူလျှိုလုပ်မှုအပြင် သူ့မြေပေါ် အကြမ်းဖက်မှုကို ပံ့ပိုးနေတယ်လို့ အိန္ဒိယအစိုးရက စွပ်စွဲမှုကြောင့် ပြန်လည် ခေါ်ယူခဲ့ရပြီး ရက်သိပ်မကြာခင်မှာပဲ ပါကစ္စတန်က အိန္ဒိယ သံတမန် ၈ ဦးကို အလားတူ ပြစ်မှုတွေ ကျူးလွန်ကြောင်း စွပ်စွဲခဲ့ပါတယ်။

နျူကလီယား ပိုင်ဆိုင်တဲ့ အိမ်နီးချင်း ၂ နိုင်ငံကြား Kashmir နယ်စပ်မှာ စစ်တပ်ချင်း ပြဿနာ ဖြစ်ပွါးမှုတွေ ဆက်တိုက် ပေါ်ပေါက်နေတာမို့ ဒေသတွင်း နောက်ထပ် စစ်ပွဲကြီး ဖြစ်လာမှာကို စိုးရိမ်နေချိန်မှာ အခုလို အပြန်အလှန် စွပ်စွဲမှုတွေပေါ် ပေါက်လာတာ ဖြစ်ပါတယ်။

အိန္ဒိယ သံတမန်တွေနဲ့ အမှုထမ်း အများအပြားဟာ RAW လို့ခေါ်တဲ့ အိန္ဒိယ ထောက်လှန်းရေးရဲ့ သုတေသနဆိုင်ရာ ဌာနနဲ့ IB ထောက်လှန်းရေး ဗျူရို က ဖြစ်ကြောင်းတွေ့ရပြီး သူတို့ဟာ သံတမန်ရေး အကြောင်းပြပြီး ပါကစ္စတန်မှာ အကြမ်းဖက်သမားတွေနဲ့ပူးပေါင်း ဆောင်ရွက်တာအပြင် သစ္စာဖေါက်လုပ်ရပ်တွေနဲ့ ဆက်နွယ်နေတာ တွေ့ရတယ်လို့ ပါကစ္စတန် နိုင်ငံခြားရေးဝန်ကြီးဌာန ပြောခွင့်ရ Nafees Zakaria က ကြာသပတေးနေ့က အစ္စလန်မာဘတ် Islamabad မှာ ပြောကြားခဲ့တာပါ။

ဒါ့အပြင် အိန္ဒိယ ကူးသန်းရောင်းဝယ်ရေးဆိုင်ရာ အကြံပေး Rajesh Kumar Agnihotri ဟာ အစ္စလန်မာဘတ်က RAW ဌာနရဲ့ အကြီးအကဲ ဖြစ်ကြောင်း တွေ့ရှိရတယ်လို့လည်း ပြောပါတယ်။

အခုလို ပါကစ္စတန်ဘက်က စွပ်စွဲမှုတွေနဲ့ ပတ်သက်ပြီး ဒါဟာ အခြေအမြစ် မရှိဘူးလို့ အိန္ဒိယ ဘက်က ပြောပြီး ငြင်းဆိုခဲ့ပါတယ်။

VOA

http://burmese.voanews.com

မောင်တောမြို့နှင့် လေးမိုင်ခန့်အကွာရှိ နယ်ခြားစောင့် ရဲကင်းစခန်းအား အကြမ်းဖက်သမားအချို့ ဝင်ရောက်တိုက်ခိုက်၍ ရဲတပ်ဖွဲ့ဝင်တစ်ဦး သေဆုံး

ဘကုန်းနားကျေးရွာနှင့် နရူလာကျေးရွာကြားရှိ နယ်ခြားစောင့် ရဲကင်းစခန်းကို ယနေ့ (နိုဝင်ဘာ ၃ ရက်) ညနေ ၆ နာရီ ၂၀ မိနစ် အချိန်ခန့်က အကြမ်းဖက်သမားများ ၀င်ရောက်တိုက်ခိုက်မှု ဖြစ်ပွားခဲ့ရာ ရဲတပ်ဖွဲ့ဝင်တစ်ဦး ကျဆုံးပြီး တစ်ဦးဒဏ်ရာ ရရှိခဲ့ကြောင်း သိရသည်။

အဆိုပါ ကင်းစခန်းမှာ မောင်တောမြို့နယ်တောင်ပိုင်း မောင်တောမြို့နှင့် လေးမိုင်ခန့် အကွာတွင် တည်ရှိပြီး ရဲတပ်ရင်း ၂၂ မှ တာဝန်ယူထားသည့်စခန်း ဖြစ်ကြောင်းလည်း သိရသည်။

လက်ရှိတွင် လုံခြုံရေး တပ်ဖွဲ့များ တိုက်ပွဲဖြစ်ပွားရာသို့ သွားရောက်၍ ရှင်းလင်းရေးများ ဆောင်ရွက်လျက်ရှိရာ ည ၈ နာရီချိန်ထိ အပြန်အလှန် ပစ်ခတ်မမှုများ ဆက်လက်ဖြစ်ပွား လျက်ရှိကြောင်း သိရသည်။

နယ်စပ်ရေးရာ ၀န်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီးရဲအောင်၊ နိုင်ငံခြားရေးဝန်ကြီးဌာန ဒုတိယ၀န်ကြီး ဦီးကျော်တင်၊ ရခိုင်ပြည်နယ် ၀န်ကြီးချုပ် ဦးညီပု၊ မြန်မာနိုင်ငံဆိုင်ရာ ဌာနေညှိနှိုင်းရေးမှူး
ရီနာတာဒက်စ်ဆယ်လီရန် အပါအ၀င် ရန်ကုန်မြို့ရှိ အမေရိကန်၊ ဗြိတိန်၊ အီဂျစ်၊ ဥရောပသမဂ္ဂ၊ အိန္ဒိယ၊ အင်ဒိုနီးရှား၊ ထိုင်း၊ တူရကီစသည့် သံအမတ်ကြီးများနှင့် သံရုံးအကြီးအကဲများသည် မောင်တောမြို့နယ် တောင်ပိုင်းသို့ နိုဝင်ဘာ ၃ ရက်နေ့က လာရောက် လေ့လာခဲ့သည်။

Eleven Media Group
http://www.news-eleven.com/

ဦးမျိုးရန်နောင်သိန်းကို ဆက်သွယ်ရေးဥပဒေပုဒ်မဖြင့် ဖမ်းဆီး

ဓာတ်ပုံ - မျိုးရန်နောင်သိန်းဖေ့စ်ဘွတ်ခ်။

အမျိုးသားဒီမိုကရေစီအဖွဲ့ချုပ် ဗဟိုသုတေသန လမ်းညွှန်အဖွဲ့ အတွင်းရေးမှူး ဦးမျိုးရန်နောင်သိန်းကို စစ်တပ်က ဒီကနေ့ညနေ ၃နာရီခန့်က ဖမ်းဆီးခေါ်ဆောင်သွားတယ်လို့ ဦးမျိုးရန်နောင်သိန်းရဲ့ မိတ်ဆွေ ဦးနေမိုးအောင်က ဒီဗွီဘီကို ပြောပါတယ်။

“လွန်ခဲ့တဲ့ ၁ နာရီလောက်က ဖမ်းသွားပါတယ်။ ရန်ကုန်တိုင်းစစ်ဌာနချုပ်ကနေ လာခေါ်တာလို့ ပြောပါတယ်။  ဆက်သွယ်ရေးဥပဒေ ပုဒ်မ ၆၆(ဃ) လို့တော့ ပြောပါတယ်ဗျာ။ ကျနော်နဲ့ အတူတူစကားပြောနေတုန်းပဲ ဖမ်းသွားတာပါ။ လာဖမ်းတာက လူလေးငါးယောက်ပါတယ်။ ဦးမျိုးရန်နောင်သိန်းကို ဘယ်ကို ခေါ်သွားလဲဆိုတာတော့ မသိရသေးဘဲ လိုက်လံစုံစမ်းနေဆဲပဲ” လို့လည်း ဦးနေမိုးအောင်က ပြောပါတယ်။

သူ့ကိုဘယ်ကိစ္စနဲ့ဖမ်းတယ်ဆိုတာကို မသိရသေးပေမယ့် လောလောဆယ်တော့ အေးအေးဆေးဆေး ဆွေးနွေးနေကြောင်း ဦးမျိုးရန်နောင်သိန်းက ဖုန်းဆက် အကြောင်းကြား ထားတယ်လို့ ပြောပါတယ်။

လွန်ခဲ့တဲ့ရက်ပိုင်းက ဦးမျိုးရန်နောင်သိန်းရဲ့ လူမှုကွန်ရက်စာမျက်နှာမှာ ရခိုင်အရေးနဲ့ ပတ်သက်ပြီး ကာကွယ်ရေးဦးစီးချုပ်ကို ဝေဖန်ထားတဲ့စာရေးတင်ထားတာ တွေ့ရပါတယ်။

DVB
http://burmese.dvb.no

ကုသလမဂ္ဂရဲ့ မြန်မာဌာနကိုယ်စားလှယ်အဖွဲ့ သတင်းစာရှင်းလင်းပွဲ

( မြန်မာနိုင်ငံဆိုင်ရာ ဌာနေညှိနှိုင်းရေးမှူး Ms Renata နဲ့ သံအမတ်အဖွဲ့ဟာ နိုင်ဝင်ဘာလ ၃ ရက်နေ့က မောင်တောမြို့နယ် အလယ်သံကျော်ကျေးရွာမှာရှိတဲ့ မွတ်ဆလင်တွေနဲ့ တွေ့ဆုံစဉ်) Photo:RFA

ရခိုင်ပြည်နယ် စစ်တွေမြို့ကို မနေ့ကရောက်ရှိလာတဲ့ ကုလသမဂ္ဂရဲ့ မြန်မာနိုင်ငံဆိုင်ရာ ဌာနေညှိနှိုင်းရေးမှူး Ms Renata နဲ့ သံအမတ်အဖွဲ့ဟာ တပ်မတော်ရဟတ်ယာဉ်နဲ့ စစ်တွေမြို့ကနေ မောင်တောမြို့နယ် အလယ်သံကျော်၊ ကိုင်းကြီး၊ ဇော်မတက်နဲ့ ရသေ့တောင်မြို့နယ် ကိုးတန်ကောက်ကျေးရွာတွေကို ဒီနေ့ သွားရောက်ခဲ့ကြပါတယ်။

မောင်တောအကြမ်းဖက်မှုဖြစ်စဉ်တွေအပေါ်မှာ လွတ်လပ်တဲ့ စုံစမ်းရေးအဖွဲ့တွေနဲ့ စုံစမ်းစစ်ဆေးဖို့လိုအပ်တယ်လို့ ကုလသမဂ္ဂရဲ့ မြန်မာနိုင်ငံဆိုင်ရာ ဌာနေညှိနှိုင်းရေးမှူး Ms Renata က စစ်တွေလေဆိပ်မှာ ဒီနေ့ညနေက ပြုလုပ်တဲ့ သတင်းစာရှင်းလင်းပွဲမှာပြောခဲ့ပါတယ်။

အဲဒီလို စုံစမ်းစစ်ဆေးနိုင်ဖို့ မြန်မာအစိုးရနဲ့ သဘောတူညီမှုရထားသလို ကြောက်လန့်မှုကြောင့် ထွက်ပြေးတိမ်းရှောင်နေရသူတွေအပေါ်မှာလည်း အစိုးရက အကူအညီတွေပေးဖို့ လိုအပ်တယ်လို့လည်း ပြောပါတယ်။

ဒီခရီးစဉ်အတွင်း သွားရောက်ခဲ့တဲ့ကျေးရွာတွေဟာ သံအမတ်ကြီးတွေ တောင်းဆိုတင်ပြခဲ့တဲ့ကျေးရွာတွေဖြစ်တယ်လို့ မြန်မာနိုင်ငံဆိုင်ရာ အမေရိကန်သံအမတ်ကြီးက ပြောပါတယ်။

ကုလသမဂ္ဂရဲ့ မြန်မာနိုင်ငံဆိုင်ရာ ဌာနေညှိနှိုင်းရေးမှူး Ms Renata နဲ့ သံအမတ်အဖွဲ့ဟာ မောင်တောမြို့နယ်အတွင်းက မွတ်ဆလင်ဒုက္ခသည်တွေကို အကူအညီပေးရေးကိစ္စနဲ့ပတ်သက်ပြီး စစ်တွေမြို့ ရခိုင်ပြည်နယ်အစိုးရအဖွဲ့ ဧည့်ဂေဟာမှာ အစိုးရတာဝန်ရှိသူတွေနဲ့ ဒီနေ့မနက်က သီးသန့်တံခါးပိတ် တွေ့ဆုံဆွေးခဲ့ပါတယ်။

ဒါ့အပြင် ရခိုင်ပြည်နယ်လွှတ်တော် ဥက္ကဌနဲ့လည်း တွေ့ဆုံဆွေးနွေးခဲ့ကြပါတယ်။

RFA Burmese
https://www.facebook.com/rfaburmese

အိပ်ရာအနီးထားသည့် ဟန်းဆက်ပေါက်ကွဲပြီး အမျိုးသမီးငယ်တစ်ဦး ဒဏ်ရာရ

အိပ်ရာဝင်စဉ် အနီးအနား၌ ထားရှိသည့် မိုဘိုင်းဟန်း ဆက်ပေါက်ကွဲမှုကြောင့် အမျိုး သမီးငယ်တစ်ဦး ဘယ်ဘက်လက်မောင်းထိခိုက်ဒဏ်ရာရခဲ့ကြောင်း သိရှိရသည်။

 ဟန်းဆက်ပေါက်ကွဲမှု ကြောင့် အသက် (၁၆)နှစ်အရွယ် မယုသဇင်ဖြိုး၏ ဘယ်ဘက်လက် မောင်း လောင်ကျွမ်းမှုဒဏ်ရာအချို့ရရှိခဲ့သည်။

‘‘အားသွင်းထားတဲ့ ဟန်း ဆက်ကို ဖြုတ်ပြီးတော့ အနားမှာထားအိပ်တာ၊ နှစ်နာရီလောက် ကြာတော့ ထပေါက်တယ်။ လက်မောင်းပဲ ဒဏ်ရာရတာပါ’’ဟုမန္တလေးတိုင်းဒေသကြီး ချမ်းမြေ့ သာစည်မြို့နယ်မှ ကာယကံရှင် မယုသဇင်ဖြိုးကပြောသည်။

 ပေါက်ကွဲမှုဖြစ်ပွားခဲ့သည့် ဟန်းဆက်သည် တရုတ်နိုင်ငံ ထုတ် Coolpad အမျိုးအစားဖြစ် ပြီး ဟန်းဆက်ဝယ်ယူသည့်အချိန် နှင့် ဟန်းဆက်မော်ဒယ်အမျိုးအ စားကို မသိရှိကြောင်း မယုသဇင် ဖြိုးက ဆိုသည်။

 ‘‘အားသွင်းထားတာကတော့ တစ်နာရီခွဲလောက်အထိ ကြာတယ်။ ပေါက်ကွဲတော့ အသံတော့ကျယ်တယ်။ အကျယ်ကြီး တော့လည်းမဟုတ်ဘူး’’ ဟု ဟန်းဆက်ပေါက်ကွဲခြင်းနှင့်ပတ်သက် ၍ မယုသဇင်ဖြိုးကပြောသည်။

ဟန်းဆက်များသည် ပါဝါ ဖွင့်ထားစဉ်၌ Network ပိုင်းဆိုင်ရာများ ရှော့ခ်ဖြစ်လာသည့်အခါ ပေါက်ကွဲမှုဖြစ်ပွားတတ်ပြီး အသုံးပြုသည့် ဘက်ထရီအရည်အသွေး ညံ့သည့်အခါများတွင်လည်း ပေါက်ကွဲမှု ဖြစ်တတ်သည်ဟု Luck Friends ဟန်းဆက် အရောင်းဆိုင်မှ technician ကိုနေမျိုးနိုင်ကဆိုသည်။

 ‘‘အသုံးပြုနေတဲ့အချိန်မှာ ဟန်းဆက်တွေ ပူလာရင်လည်း ပေါက်ကွဲတတ်တယ်။ အားသွင်း ကြိုးတွေ၊ ဘက်ထရီတွေအရည် အသွေးနိမ့်ရင်လည်း ပေါက်ကွဲ တတ်တယ်။ တရုတ်ကလာတဲ့ ဘက်ထရီအပိုတွေကို ၀ယ်မသုံး စေချင်ဘူး’’ဟု ကိုနေမျိုးနိုင်က အကြံပြုသည်။

ဟန်းဆက် ဘက်ထရီပြဿ နာနှင့်ပတ်သက်၍ မကြာမီက Samsung Galaxy Note 7 တွင် ကြုံတွေ့ခဲ့ရသည့်အတွက် ကုမ္ပဏီအနေဖြင့် အဆိုပါဟန်းဆက် ရောင်းချခြင်းနှင့် ထုတ်လုပ်ခြင်း ကို အောက်တိုဘာက ရပ်ဆိုင်းခဲ့ရသည်။

7Day Daily
http://www.7daydaily.com/

မုံရွာနှစ်လောင်းပြိုင် လူသတ်မှု ဖော်ထုတ် ဖမ်းဆီး

အလောင်းပြိုင် လူသတ်မှုဖြစ်စဉ်များအနက် မုံရွာနှစ်လောင်းပြိုင် လူသတ်မှုအား ခုနှစ်ရက်အတွင်း ရဲတပ်ဖွဲ့က ဖော်ထုတ်ဖမ်းဆီး အရေးယူနိုင်

မုံရွာ၊ နိုဝင်ဘာ ၃

စစ်ကိုင်းတိုင်းဒေသကြီး မုံရွာမြို့ ကန်သာဦးရပ်ကွက်၊ သမာဓိလမ်း၊ အိမ်အမှတ် ၂/ ၉၉ တွင် အောက်တိုဘာ ၂၇ ရက် မနက်ပိုင်းက ဖြစ်ပွားခဲ့သော နှစ်လောင်းပြိုင် လူသတ်မှုနှင့်ပတ်သက်၍ ပြစ်မှုကျူးလွန်သူကို အရေးယူဆောင်ရွက်ပေးရန် တရားလိုပြုလုပ်တိုင်တန်ခဲ့သူ မုံရွာနယ်မြေရဲစခန်းမှူး ရဲအုပ် ရဲအောင်နှင့်အဖွဲ့က ပြစ်မှုဖြစ်ပွားသည့်နေ့ ရက်မှစတင်ကာ ၎င်းအမှုအား ခုနှစ်ရက်အတွင်း ဖော်ထုတ်အရေးယူလိုက်ဖြစ်ကြောင်း သိရသည်။

အဆိုပါ မုံရွာနှစ်လောင်းပြိုင် လူသတ်မှုဖြစ်ပွားရသည့် ပြစ်မှုအရင်းအမြစ်မှာ မူးယစ်ဆေးဝါးဆိုင်ရာ ကိစ္စရပ်များနှင့် ဆက်စပ်နေသည်ဟု ထင်မြင်သုံးသပ်၍ မုံရွာနယ်မြေရဲစခန်းမှူး ရဲအုပ် ရဲအောင်နှင့်အဖွဲ့သည် နှစ်လောင်းပြိုင် လူသတ်မှုဖြစ်ပွားပြီးနောက် နာရီပိုင်းအကြာ အောက်တိုဘာ ၂၇ ရက်ည ၇ နာရီခွဲအချိန်က နှစ်လောင်းပြိုင် လူသတ်မှုဖြစ်ပွားရာ ကန်သာဦးရပ်ကွက်၊ ရတနာလမ်းနေ ကိုဇော်မျိုးဦး(ခ) ကိုဇော်ဦး ဆိုသူထံမှ ဘိန်းဖြူမှုန့် အလေးချိန်( ၀ ဒသမ ၁)ဂရမ် ပါဝင်သော ပနယ်စလင်ပုလင်း(၁)ပုလင်းနှင့် မူးယစ်ဆေးဝါးရောင်းရငွေ လေးသောင်းကျပ်အား ဖမ်းဆီးရရှိခဲ့သည်။

ယင်းအမှုအား မုံရွာနယ်မြေရဲစခန်း မူးယစ်(ပ) ၁၆/ ၂၀၁၆ မူးယစ် ဥပဒေ ပုဒ်မ ၁၅(က)/၁၆(က)/၂၀ အရ အမှုဖွင့် အရေးယူဆောင်ရွက်ခဲ့သည်။ ထို့နောက် မုံရွာနယ်မြေရဲစခန်း ပြစ်မှုကြီးဖြစ်စဉ်အမှတ် ၈/၂၀၁၆ ပထမသတင်းပေးတိုင်တန်းချက်အမှတ်(ပ) ၇၅၃ / ၂၀၁၆ ရာဇသတ်ကြီး ပုဒ်မ ၃၀၂ နှစ်လောင်းပြိုင် လူသတ်မှု၏ တရားလိုဖြစ်သူ ရဲစခန်းမှူး ရဲအုပ် ရဲအောင်နှင့်အဖွဲ့သည် အဆိုပါ အမှုနှင့်ပတ်သက်၍ မသင်္ကာဖွယ်ရာ သတင်းရရှိထားသူ မန္တလေးတိုင်းဒေသကြီး သပိတ်ကျင်းမြို့နယ်၊ ဇရပ်ကွင်းကျေးရွာနေ ကိုအောင်နိုင်မင်း(ခ) ဘိုဆူးခတ် ဆိုသူမှာ မုံရွာမြို့ ရုံးကြီးရပ်ကွက်၊ ခါးပန်းနီကျောင်းတိုက်တွင် ရောက်ရှိနေကြောင်း သတင်းရရှိခဲ့သည်။

ထို့ကြောင့် မုံရွာမြို့နယ် ရဲတပ်ဖွဲ့မှူး ရဲမှူး မြင့်ကျော် ဦးစီး၍ အဆိုပါ ဘုန်းကြီးကျောင်းအတွင်းရောက်ရှိနေသူအား အောက်တိုဘာ ၂၉ ရက် မနက် ၃ နာရီအချိန်က ၀င်ရောက်ရှာဖွေ ဖမ်းဆီးခဲ့ရာ သတင်းရရှိထားသူ ကိုအောင်မင်းနိုင်း(ခ) ဘိုဆူးခက် ဆိုသူအား ၄၆ယ/ ၂၇၅၄၀ တရုတ်ကလစ်ဆိုင်ကယ်တစ်စီးနှင့်အတူ တွေ့ရှိခဲ့ရသဖြင့် ရဲတပ်ဖွဲ့က အဆိုပါ ဆိုင်ကယ်အား ရပ်ကွက်အုပ်ချုပ်ရေးအဖွဲ့ သက်သေများ၏ ရှေ့မှောက်တွင် ဆိုင်ကယ်အား ရှာဖွေစစ်ဆေးခဲ့ရာ ဆိုင်ကယ်ဖင်ထိုင်ခုံအောက်ရှိ တူးဘောက်အတွင်းမှ ပန်းရောင်ရူးသွပ်စိတ်ကြွဆေးပြာ(၂၀၀)ပြား၊ အဖြူဝါရောင်အမှုန့်များကပ်လျက်ရှိသော ပုနယ်စလင်ပုလင်းတစ်လုံး၊ ငွေစက္ကူရောရာ ငွေကျပ်(၁၁)သိန်းတို့အား တွေရှိခဲ့ရသည်။

ထို့ကြောင့် ရဲစခန်းမှူး ရဲအုပ် ရဲအောင်က ကိုယ်တိုင် အမှုတိုင်တန်းချက်ရေးဖွင့်ခဲ့ရာ မုံရွာနယ်မြေရဲစခန်း မူးယစ်(ပ) / ၂၀၁၆ မူးယစ်ဆေးဝါးနှင့် စိတ်ကိုပြောင်းလဲစေသော ပုဒ်မ ၁၅/၁၉(က)/ ၂၀(က) အရ ဒုရဲအုပ် ကိုကိုအောင်မှ ၎င်းအမှုအား စစ်ဆေးဆောင်ရွက်လျက်ရှိသည်။

ထို့အပြင် အောက်တိုဘာ ၂၉ ရက်မနက် ၁၀ နာရီခွဲအချိန်ခန့်က နှစ်လောင်းပြိုင် လူသတ်မှုမှ တရားလိုပြုလုပ်တိုင်တန်းခဲ့သူ မုံရွာနယ်မြေရဲစခန်းမှူး ရဲအုပ် ရဲအောင်နှင့်အဖွဲ့သည် နှစ်လောင်းပြိုင်လူသတ်မှုဖြစ်ပွားရာ နေအိမ်အတွင်းရှိ ပစ္စည်းများအား စစ်ကိုင်းတိုင်းဒေသကြီး မှုခင်းရဲတပ်ဖွဲ့ခွဲရုံးရှိ ရဲအရာရှိများ၊ ရပ်ကွက်အုပ်ချုပ်ရေးအဖွဲ့များ၊ ရပ်မိရပ်ဖများနှင့်အတူ ၀င်ရောက်ရှာဖွေစစ်ဆေးခဲ့ရာ လူသတ်မှုဖြစ်ပွားခဲ့ရာ နေအိမ်အတွင်း၊ အိပ်ခန်းကုတင်ခြေရင်ဘက်အောက်နေရာ၊ သေဆုံးသူ အမျိုးသမီး၏ ရုပ်အလောင်းတွေ့ရှိခဲ့သည့်နေရာ ကုတင်အောက်တွင် သွေးများစွန်းထင်ပေကျံလျက်ရှိသော 555 အမှတ်တံဆိပ်ပါ ပလပ်စတစ်အဖြူရောင် ဗူးအတွင်းမှ ပန်းနုရောင် ဆပ်ပြာခွက်အတွင်း ပလပ်စတစ်ဖြင့်ထုတ်ထားသော ဘိန်းဖြူမှုန့်ဟုယူဆရသော အမှုန့်တစ်ထုပ်၊ ကမ္ဘာလုံးအမှတ်တံဆိပ်ပါ အပြာရောင် ပလပ်စတစ်အိတ်ဖြင့်ထည့်ထားသော ရူးသွပ်စိတ်ကြွဆေးပြာ(၁၈၄)ပြား၊နှင့် နေအိမ်အတွင်း မီးဖိုချောင်သုံး ကြောင်အိမ်အောက်ထပ်အခန်းမှ တွေ့ရှိရသော အမျိုါ်သမီးအတွင်းခံ အ၀တ်အထည်များကြားမှ ငွေစက္ကူရောရာ တစ်သိန်း၊လေးသောင်း၊ ငါးထောင်ကျပ် တို့အား ထပ်မံရှာဖွေ သိမ်းဆီးရရှိခဲ့သည်။

ထို့ကြောင့် အဆိုပါ ရှာဖွေတွေ့ရှိခဲ့ရသော မူးယစ်ဆေးဝါးများနှင့် ငွေကြေးများအား မုံရွာနယ်မြေရဲစခန်းက မူးယစ်(ပ) ၁၈/၂၀၁၆၊ မူးယစ်ဆေးဝါးနှင့် စိတ်ကိုပြောင်းလဲစေသော ဥပဒေ ပုဒ်မ ၁၅/၁၉(က)/ ၂၀(က) အရ အမှုဖွင့်အရေးယူဆောင်ရွက်လျက်ရှိသည်။

အဆိုပါ မူးယစ်ဆေးဝါးဆိုင်ရာ အမှုကိစ္စများအား နှစ်လောင်းပြိုင် လူသတ်မှု တရားလို အမှုစစ် ရဲအရာရှိမှ စနစ်တကျစစ်ဆေးဆောင်ရွက်ရာတွင် နှစ်လောင်းပြိုင် လုပ်ကြံသတ်ဖြတ်ခြင်းခံရသော နေအိမ်မှ သေဆုံးသူ လင်မယားထံမှ မုံရွာမြို့ အောင်ချမ်းသာရပ်ကွက်နေ ကောင်းကောင်း(ခ) မောင်ကောင်းခန့်သော် ဆိုသူက မူးယစ်ဆေးဝါးများ တဆင့်ဝယ်ယူ၍ မုံရွာမြို့တွင်း ပြန်လည်ဖြန့်ဖြူးရောင်းချပေးလျက်ရှိကြောင်း အမှုစစ်ရဲ အရာရှိမှ သိရှိခဲ့ရသည်။ ထို့ကြောင့် မုံရွာနယ်မြေရဲစခန်းမှူး ရဲအုပ် ရဲအောင်နှင့်အဖွဲ့သည် အောက်တိုဘာ ၃၀ ရက်နေ့ မနက်မှ စတင်၍ နှစ်လောင်းပြိုင် လူသတ်မှုတွင် ပါဝင်ပတ်သက်နေသည်ဟု မသင်္ကာသူ ကောင်းကောင်း(ခ) ကောင်းခန့်သော်၏ နေထိုင်ရပ်တည်မှုအား လိုက်လံစုံစမ်းခဲ့ရာ ကောင်းကောင်း(ခ) ကောင်းခန့်သော်သည် သီးတင်းကျွတ် လပြည့် အဘိတ်နေ့ရက်တွင် ဇနီးဖြစ်သူနှင့်အတူ မုံရွာနေအိမ်မှ မန္တလေးမြို့ရှိ သူ၏ ယောက္ခမ မိသားစုရှိရာသို့ သွားရောက်ခဲ့ကြောင်း သိရသ့ည်။ ၎င်း မသင်္ကာသူမှာ အောက်တိုဘာ ၂၆ ရက်တွင် မန္တလေးမှ မုံရွာသို့ အတိတ်တစိတ်ပြန်ရောက်လာပြီး အောက်တိုဘာ ၂၇ ရက် နှစ်လောင်းပြိုင် လူသတ်မှုဖြစ်ပွားသည့်နေ့ရက် မနက်တွင် လွန်ခဲ့သော တစ်လခွဲခန့်က မီးဖွားစရိတ်မရှိသဖြင့် ၎င်းမှ ငွေကျပ် သုံးသိန်းဖြင့် ပေါင်နှံထားသည့် ထရစ်ကာ ဆိုင်ကယ်အား ပြန်လည်ရွေးယူခြင်း၊ မုံရွာမြို့ ထန်းတောရပ်ကွက်နေ အမျိုးသမီးတစ်ဦးထံ စုကြေးငွေ ခြောက်သောင်းကျပ်အား ပေးသွင်းခြင်း၊ ကွေ့ကြီးရပ်ကွက်နေ အမျိုးသမီးတစ်ဦးထံမှ ချေးငှားရယူထားသည့် ငွေကြေးများ ပြန်လည်ဆပ်ပေးခြင်း၊ ၎င်း၏ သူငယ်ချင်းနှစ်ဦး အပါအ၀င် အောက်တိုဘာ ၂၇ ရက်ညနေပိုင်းမှစတင်၍ မုံရွာမြို့ မြို့သစ်ရပ်ကွက်အတွင်းရှိ KTV ဆိုင်တစ်ဆိုင်သို့သွားရောက်၍ သီချင်းဆိုစားသောက်ခဲ့ရာ ကုန်ကျစရိတ် ငွေကျပ် လေးသိန်းနီးပါးရှိခဲ့ခြင်း၊ သူ၏ဖနီးဖြစ်သူထံ အသေးသုံးငွေအဖြစ် ငွေကျပ်လေးသိန်းအား ပေးအပ်ခဲ့ခြင်း၊ ဖနီးသည်မှ မီးဖွားစရိတ်အဖြစ် ပေါင်းနှံထားသည့် ရွှေထည်ပစ္စည်းအချို့အား ပြန်လည်ရွေးယူပေးခြင်း စသည့် သတင်းအချက်အလက်များအား ရဲအုပ် ရဲအောင်နှင့်အဖွဲ့က စုံးစမ်းသိရှိခဲ့ရသည်။ ထို့ကြောင့် အောက်တိုဘာ ၃၁ ရက်နေ့တွင် စစ်ကိုင်းတိုင်ူဒေသကြီး ရဲတပ်ဖွဲ့မှူး ရဲမှူးကြီး လူလူသန်း၏ အနီးကပ် ကြီးကြပ်ကွက်ကဲမှုများကို ရယူ၍ အမှုစစ်ရဲအရာရှိ ရဲအုပ် ရဲအောင်နှင့်အဖွဲ့သည် တိုင်းမှုကူဌာနစု ဌာနစုမှူး ဒုရဲမှူး မိုးသူ ၊ မုံရွာခရိုင် မှုခင်းနှိမ်နင်းရေးဌာနစု ဌာနစု အဖွဲ့ခေါင်းဆောင် ရဲအုပ် လင်းထက်နိုင်၊ ထို့အပြင် စစ်ကိုင်းတိုင်းဒေသကြီး မှုခင်းတပ်ဖွဲ့ခွဲရုံး( မုံရွာ)အဖွဲ့နှင့် ပူးပေါင်း၍ ကောင်းကောင်း(ခ) ကောင်းခန့်သော်အား ဖမ်းဆီးနိုင်ရန်အတွက် လိုက်လံရှာဖွေခဲ့ကြသည်။
အဆိုပါ ပူးပေါင်းအဖွဲ့မှ လိုက်လံရှာဖွေလျက်ရှိသှော ကောင်းကောင်း(ခ) ကောင်းခန့်သော် ဆိုသူမှာ သူ၏ ဇနီးသည်နေထိုင်ရာ မန္တလေးမြို့မှ တဆင့် ဗန်းမော်မြို့သို့ ထွက်ပြေးတိမ်းရှောင်သွားကြောင်း စုံးစမ်းသိရှိရသဖြင့် ကောင်းကောင်း(ခ) ကောင်းခန့်သော် အသုံးပြုလျက်ရှိသော အင်တာနက်စာမျက်နှာမှတဆင့် စကားပြောဆိုမှု စည်းရုံးခြင်းများ ပြုလုပ်ခဲ့သည်။

မုံရွာနှစ်လောင်းပြိုင် လူသတ်မှုတွင် ပါဝင်ပတ်သက်သူဟု ရဲတပ်ဖွဲ့မှ သံသယရှိသူ ကောင်းကောင်း(ခ) ကောင်းခန့်သော်မှာ နိဝင်ဘာ ၂ ရက်မနက် ၈ နာရီခွဲအခချိန်ခန့်တွင် တိုင်းမှုကူဌာနစိပ်အဖွဲ့မှ သတင်းအရ စစ်ကိုင်းမြို့ ကားဂိတ်မှ စောင့်ဆိုင်နေစဉ် ဖမ်းဆီးရရှိခဲ့သည်။ ထို့နောက် ရဲဌာန၏ လုပ်ငန်းစဉ်များအရ ထိုသူအား မုံရွဲာပည်သူ့ဆေးရုံကြီး မှုခင်း ဥပဒေရေးရာ ဆရာဝန်ကြီးထံသွားရောက်၍ ဆေးစစ်ချက်များ တောင်းခံရယူခြင်း၊ မုံရွာမြို့နယ် တရားရုံးတွင် အမှုစစ်ဆေးစဉ် ချုပ်နှောင်ခွင့်များတောင်းခံရယူခြင်းများ ပြုလုပ်ခဲ့ပြီးနောက် နိုဝင်ဘာ ၂ ရက်ည အချိန်တွင် နှစ်လောင်းပြိုင် လူသတ်မှုနှင့်ပတ်သက်၍ စစ်ဆေးဆောင်ရွက်ခဲ့ရာ ထိုသူက အဆိုပါ လူသတ်မှုတွင် ကိုယ်တိုင်ကျူးလွန်ခဲ့ကြောင်း စစ်ဆေးရေးအဖွဲ့ထံ ၀န်ခံထွက်ဆိုခဲ့ပြီးနောက် နိဝင်ဘာ ၂ ရက် ည ၁၁ နာရီအချိန်ခန့်တွင် နှစ်လောင်းပြိုင် လူသတ်မှုဖြစ်ပွားရာ နေအိမ်သို့သွားရောက်၍ ပြစ်မှုကျူးလွန်စဉ်က တွေကြုံရသော အခြေအနေ အရပ်ရပ်များကို ထိုသူကိုယ်တိုင် ပြန်လည်သရုပ်ပြကာ အမူအရာများဖြင့် ၀န်ခံထွက်ဆိုချက်များပေးခဲ့သည်။

ထို့နောက် ကောင်းကောင်း(ခ) ကောင်းခန့်သော်သည် နှစ်လောင်းပြိုင် လူသတ်မှုကျူးလွန်စဉ်က အသုံးပြုခဲ့သော ဓားတစ်ချောင်းအား ၎င်း၏ နေအိမ် မိလ္လာကျင်းအတွင်းစွန့်ပစ်ခဲ့ကြောင်း ပြောသဖြင့် အမှုစစ်ရဲအရာရှိနှင့် ပူးဒပေါင်းအဖွဲ့က အဆိုပါ မိလ္လာကျင်းထဲမှ အညစ်အကြေးများအား စက်ယန္တရားများဖြင့် ညတွင်းချင်းစုပ်ယူထုတ်ကာ မိလ္လာကျင်းအတွင်း ရှာဖွေစစ်ဆေးကြည့်ရာ ဓားအိမ်ပါ ဓားတစ်ချောင်းအားတွေ့ရှိခဲ့ရသည်။ ထို့အပြင် လူသတ်မှုကျူးလွန်စဉ်က ထိုသူဝတ်ဆင်ခဲ့သော အ၀တ်အထည်များအား မုံရွာ - မန္တလေး ကားလမ်း မိုင်တိုင်အမှတ် ၆၇/၅ နှင့် ၆၇/၆ အကြား လမ်းဘေးတစ်နေရာ ရေကျော်အနီးစွန့်ပစ်ခဲ့ကြောင်း ထပ်မံပြောပြသဖြင့် ပူးပေါင်းရဲအဖွဲ့မှ နိုဝင်ဘာ ၃ ရက် မနက် ၁ နာရီအချိန်က သွားရောက်ရှာဖွေခဲ့ရာ နှစ်လောင်းပြိုင် လူသတ်မှုကျူးလွန်စဉ်က ကျူးလွန်သူ ၀တ်ဆင်ခဲ့သည်ဟု ထင်မြင်ယူဆရသည့် အ၀တ်ထုပ် တစ်ထုပ်အား ကောင်းကောင်း(ခ) ကောင်းခန့်သော်၏ ညွှန်ပြမှုအရ ပူးပေါင်းရဲအဖွဲ့မှ သိမ်းဆီးခဲ့ကြောင်း သိရသည်။

၂၀၁၆ ခုနှစ်အတွင်း နိုင်ငံ့အ၀ှမ်းဖြစ်ပွားခဲ့သော လေးလောင်းပြိုင်၊ သုံးလောင်းပြိုင်၊ နှစ်လောင်းပြိုင် လူသတ်မှု ဖြစ်စဉ်များအနက် မုံရွာနှစ်လောင်းပြိုင် လူသတ်မှုသည် မှုခင်းဖြစ်ပွားသည့်နေ့ရက်မှ ခုနှစ်ရက်တာ ကာလအတွင်း သက်သေခံပစ္စည်းများနှင့်အတူ ပြစ်ကျူးလွန်သူဟု ၀န်ခံသူကိုပါ ရဲတပ်ဖွဲ့မှ လက်ရဖမ်းဆီးရရှိခဲ့ခြင်းဖြစ်ကြောင်း သိရှိရသည်။

သတင်း + ဓာတ်ပုံ = ကိုတိုးကြီး
https://www.facebook.com/monywa.maung