 |
| နစ်မြုပ်သွားသော ဘက်ဟိုးနှစ်စီး(စက်ဝိုင်းဖြင့် ၀ိုင်းပြထား) ကို ဆယ်ယူရန် ဆောင်ရွက်နေစဉ် |
ဖားကန့်ဒေသရှိ ကျောက်မျက်ကုမ္ပဏီ တစ်ခုမှ လုပ်ငန်းခွင်တစ်ခုအတွင်း မြေစာပြိုကျမှုကြောင့် ဘက်ဟိုးနှစ်စီး ရေအောက်နစ်မြုပ်ပြီး ပြင်ပမှ ညအချိန် ရေမဆေးကျောက် ၀င်ရောက်ရှာဖွေသူတစ်ဦး ပျောက်ဆုံးနေကြောင်း သိရသည်။
စက်တင်ဘာ ၃၀ ရက် နံနက် ၁ နာရီ ၀န်းကျင်တွင် ဖားကန့်မြို့နယ်၊ အေးမြသာယာရပ်ကွက်၊ မော်မောင်းလယန် ကျေးရွာ အနီးရှိ ကချင်တိုင်းရင်းသားများ ဖွံ့ဖြိုးတိုးတက်ရေး ကုမ္ပဏီ (KNDPC) လုပ်ကွက်မှ လုပ်ငန်းခွင်အတွင်း မြေပြိုကျမှု ဖြစ်ပေါ်ရာ ကုမ္ပဏီပိုင် ဘက်ဟိုးနှစ်စီးမှာ မြေစာနှင့်အတူ မျောပါသွားပြီး ရေကန်အတွင်း နစ်မြုပ်သွားခဲ့ကြောင်း သိရသည်။ ထို့အတူ ပြင်ပမှ လုပ်ကွက်အတွင်း ၀င်ရောက်ကာ ညအချိန် ရေမဆေးကျောက် ၀င်ရောက်ရှာဖွေနေသည့် ရှရော်ခကျေးရွာမှ ရေမဆေးသမားတစ်ဦးလည်း မြေပြိုကျမှုတွင် မျောပါပျောက်ဆုံးသွားကြောင်း မျက်မြင်သက်သေ တစ်ဦးက ပြောကြားသည်။
“ကျွန်တော်တို့က တစ်အိမ်တည်း အတူနေကြတာပါ။ ည ၈ နာရီလောက်မှာ ဆိုင်ကယ်တစ်စီးနဲ့ ကျောက်သွားရှာကြတယ်။ ပြိုကျတဲ့ အချိန်က နံနက် ၁ နာရီခွဲ ၀န်းကျင်လောက်မှာပါ။ အဲဒီအချိန်မှာ လူ ၁၅ ယောက်လောက် ရှာနေတဲ့သူ ရှိတယ်။ အခု ပျောက်နေတဲ့သူက ဘက်ဟိုးနှစ်စီးကြားထဲ သွားရှာတာ တွေ့လိုက်တယ်။ သူသွားရှာလို့ မကြာခင်မှာပဲ အဲဒီနေရာက ပြိုကျပြီး ဘက်ဟိုးနှစ်စီးလည်း ရေထဲမြုပ်သွားတယ်။ ကျွန်တော်တို့ လူကို မတွေ့ရတော့ဘူး။ ဒီနေ့ညနေပိုင်းအထိ မတွေ့ရဘူး။ သူများဆိုင်မှာ အပ်ထားတဲ့ သူ့ဆိုင်ကယ်ကိုလည်း ခုထိ လာမယူဘူး။ မြေပြိုတဲ့အထဲ ပါသွားတာ သေချာပါတယ်” ဟု ပျောက်ဆုံးနေသူနှင့် အတူနေ သူငယ်ချင်း ကိုသိန်းဇော်က ပြောကြားသည်။
ပျောက်ဆုံးနေသူမှာ အေးမြသာယာရပ်ကွက် ရှရော်ခကျေးရွာနေ ဦးဝင်းဦး (၄၇ နှစ်) (ဘ)ဦးလူမောင်ဖြစ်ကြောင်း သိရသည်။ ယခုကဲ့သို့ ပျောက်ဆုံးနေခြင်းအား ရှရော်ခကျေးရွာ အုပ်ချုပ်ရေးအဖွဲ့မှ မျက်မြင်သက်သေနှင့်အတူ အခင်းဖြစ်နေရာသို့ သွားရောက် စုံစမ်းသော်လည်း ကုမ္ပဏီဘက်မှ တာဝန်ရှိသူများက ၎င်းတို့ လုပ်ကွက်အတွင်း တစ်ဦးတစ်ယောက်မျှ သေဆုံးခြင်း မရှိကြောင်း အခိုင်အမာ ငြင်းဆိုလျက် ရှိသည်။
“နံနက် အစောပိုင်းမှာ ပြိုကျတာပါ။ ကျွန်တော်တို့ လုပ်ငန်း ဒုတိယပိုင်းစတဲ့ အချိန်ပေါ့။ အဲဒီအချိန်မှာ ဘယ်ရေမဆေးသမားမှလည်း မရှိပါဘူး။ ကျွန်တော်တို့ ရှိပါတယ်။ ညဆိုသူတို့လည်း တော်ရုံတန်ရုံ မလာရဲဘူး။ ကျွန်တော်တို့က စက်နှစ်စီး ပါသွားပါတယ်။ စက်သမားတွေလည်း ဘာမှမဖြစ်ပါဘူး” ဟု ကုမ္ပဏီလုံခြုံရေးမှူး ဦးစိုးနိုင်က ပြောကြားသည်။
“တကယ်လို့ သူတို့ပြောသလို လူပါသွားတယ်ဆိုရင် နေရာအနေအထားပေါ် မူတည်ပြီး ဆောင်ရွက်သွားမှာပါ။ အခု အနေအထားအရဆို ရှာပေးလို့ မရဘူး။ နွံရော ရေရော ရှိနေတယ်။ ဖြစ်နိုင်ရင်တော့ ရှာပေးမှာပါ။ မသိချင်ယောင် ဆောင်မနေပါဘူး။ ပတ်ဝန်းကျင်မှာ လူအများကြီိး ရှိတယ်။ ဖုံးကွယ်ထားလို့ မရပါဘူး” ဟု KNDPC ကုမ္ပဏီ တာဝန်ခံ ဦးဇော်အောင်က ဆိုသည်။
အောင်ဟိန်းမင်း
Eleven Media Group
http://www.news-eleven.com/